ნარკოტიკული თრობის სურათის შეცვლა

სიმპტომი ფორმირდება ნარკოტიკული საშუალების სისტემატური მოხმარების, მაღალი ტოლერანტობის და დაცვითი რეაქციების გაქრობის შემდეგ. იგი უმეტესად გამოვლინდება ნარკოტიკული საშუალების ეიფორიული თვისების შეცვლით, მისი ბუნების პარადოქსული და სომატურ-ვეგეტატიური ეფექტების ცვლილებებით. მაგ., მორფინი დამთრგუნველი მოქმედების ნაცვლად იძლევა ზოგადი ფსიქოფიზიკური და სულიერი „აღმავლობის“ შეგრძნებას (Сербский В.И. 1912). სედაციური ნარკოტიკული საშუალებების ეფექტი კლებულობს და იცვლება სტიმულაციური ეფექტით. ბარბიტურატებით და ოპიოიდებით თრობის დროს საწყის ეტაპებზე თუ გამოხატულია მოტორული მოდუნება, შეკავება, შემდგომში ადგილი აქვს გააქტიურებას, მოძრაობების გახშირებას, აგზნებადობას. იცვლება მნესტიკური ფუნქციები სედაციური და ფსიქოდელიური პრეპარატების გამოყენებისას. დაავადების გაღრმავებასთან ერთად თავს იჩენს პალიმფსესტები, ხოლო ბარბიტურომანიის დროს – გამოხატული ამნეზიური მდგომარეობები, სტიმულატორები აღარ იწვევს ტაქიკარდიას, კოდეინი აღარ მოქმედებს ხველების ცენტრზე, ოპიუმის პრეპარატები ადარ იწვევს კუჭ-ნაწლავის და შარდ-სასქესო სისტემებში სპეციფიკურ ცვლილებებს