ოლეგ ლიპარტელიანი

   სსრ კავშირის სამგზის ჩემპიონი (1987, 1988, 1989), მეორე (1984) და ორგზის მესამე (1978, 1985) პრიზიორი. საერთაშორისო კლასის სპორტის ოსტატი, სსრკ თასის სამგზის მფლობელი (1978, 1987, 1990), საქართველოს ნაკრების პირველი კაპიტანი (1989 - 1990).  

  დაიბადა ლენტეხში.  რაგბის თამაში 1975 წელს გელა მიქაბერიძემ დააწყებინა  საქ. პოლიტექნიკური ინსტიტუტის მორაგბეთა ნაკრებში. პირველივე დღეებიდან რაგბის სპეციალისტთა ყურადღების ცენტრში მოექცა. მალე "ლოკომოტივში" გადაიყვანეს. ახლა უკვე მისით "საბჭოთა რაგბის მამებიც" დაინტერესედნენ და მოსკოვში შესთავაზეს გადასვლა, მაგრამ ოლეგმა ეს არ ისურვა. იგი საბჭოთა კავშირის ნაკრებში უყოყმანოდ აიყვანეს და საერთაშორისო რაგბის წრეებშიც ცნობილი გახდა. ოლეგის თამაშით მაყურებელი ყოველთვის მოხიბლული იყო; უაღრესად სწრაფი, კუნთმაგარი, მოუხელთებელი, რომელსაც ვერავინ გაექცეოდა. იმ დროის "ლოკომოტივის" წარმატებებში უდედესი იყო მისი წვლილი; საბჭოთა კავშირის თასი, ბრინჯაოს მედალი, საერთაშორისო მატჩებში გამარჯვებები, შემდეგ კი ქუთაისი. იქ ოლეგმა , როგორც გუნდის თავმა და ერთ - ერთმა მწვრთნელმა დიდი როლი შეასრულა "აიას" ისტორიაში. გუნდი სამჯერ გახდა იმპერიის ჩემპიონი, ერთხელ მეორე ადგილი და ვერცხლის მედალი მოიპოვა, ორჯერ ბრინჯაო, სსრკ თასსაც ორჯერ დაეუფლა. ამ ჯილდოებს დაემატა საკავშირო ნაკრების მიერ ევროპის პირველობაზე მოპოვებული ვერცხლი და ბრინჯაო და  საერთაშორისო კლასის სპორტის ოსტატის საპატიო წოდება. მას გადაეცა საქ. უმაღლესი ჯილდო - ღირსების ორდენი. 

წყარო: ქართული სპორტის ოქროს წიგნი / ელგუჯა ბერიშვილი. - თბილისი:პალიტრა L, 2013. -  304 გვ

• "აია" ქუთაისი (1984-1990)
• "ლოკომოტივი" თბილისი (1973-1983)

• 1978 - სსრ კავშირის თასი, სსრკ ჩემპიონატი. თბილისი