ლევან ფალავანდიშვილი

დაიბადა თბილისში. კალათბურთელი (177 სმ). მრავალფეროვანი სპორტული კარიერა 14 წლის ასაკში დაიწყო. თავიდან ტანვარჯიშს მისდევდა (1920-23), თბილისის გიმნაზიაში არჩილ ბაქრაძის ხელმძღვანელობით მეცადინეობდა, შემდეგ ფეხბურთმა გაიტაცა. თამაშობდა “მალსტრემში” (1924-26). წარმატებებს მიაღწია მძლეოსნობაშიც – 1928 წელს სსრკ ხალხთა სპარტაკიადაში მონაწილეობდა და საქართველოს ორი რეკორდიც დაამყარა (ხელყუმბარის ტყორცნასა და სამხტომში). თამაშობდა საქართველოს ფრენბურთელთა ნაკრებშიც (1934). კარიერის უდიდესი ნაწილი კალათბურთს დაუთმო. ამ სახეობაში ვარჯიში 1926 წელს დაიწყო. თამაშობდა თბილისის სახელმწიფო უნივერსიტეტის გუნდში (1927-29), თბილისის ნაკრებსა (1929-34) და “დინამოში” (1934-45). იყო სსრკ ჩემპიონატის მესამე პრიზიორი (1935). ქართველ კალათბურთელთაგან პირველმა ითამაშა სსრკ ნაკრების შემადგენლობაში (1934). სსრკ სპორტის დამსახურებული ოსტატი, საერთაშორისო კატეგორიის არბიტრი. მსაჯად იყო მიწვეული ევროპის არაერთი ჩემპიონატის შეხვედრებზე. ღირსების ორდენის კავალერი.

• "დინამო" თბილისი