მარია პერინი

დაბადების ადგილი: ქ. ტურინი, იტალია.

1883-1890 წლებში სწავლობდა ქ. ტურინში სამეფო ოპერის თეატრთან არსებულ საბალეტო სკოლაში.

1888-1897 წლებში იყო ქ. ტურინის სამეფო ოპერის თეატრის სოლისტი-მოცეკვავე. 1890-1897 წლებში წარმატებით გამოდიოდა თბილისის ოპერის თეატრის (სახაზინო თეატრი) სცენაზე, ჯერ როგორც გასტროლიორი, შემდეგ, 1897-1907 წლებში როგორც წამყვანი ბალერინა. 1907-1916 წლებში ეწეოდა საკონცერტო მოღვაწეობას. 1916 წელს თბილისში დააარსა პირველი საბალეტო სტუდია (1920 წლიდან ეწოდა თბილისის ოპერისა და ბალეტის თეატრის სკოლა), სადაც ეწეოდა პედაგოგიურ მოღვაწეობას (1935 წლამდე). ამ სტუდიაში აღიზარდნენ: ვ. და თ. ჭაბუკიანები, ნ. რამიშვილი, ი. სუხიშვილი, ი. და დ. ალექსიძეები, ე. გვარამაძე, ს. ვირსალაძე, ვ. ვრონსკი-ნადირაძე, ე. ჩიკვაიძე, მ. ბაუერი. 1935-1938 წლებში ხელმძღვანელობდა თბილისის ოპერისა და ბალეტის თეატრის ქორეოგრაფიულ სკოლა-სტუდიის ფილიალს. საქართველოში მოღვაწე იტალიელი ბალერინა. მისი მეუღლე იყო წარმოშობით პოლონელი, ქუთაისში დაბადებულ-აღზრდილი მხატვარი, ფერმწერი, გრაფიკოსი, მკვლევარი, პედაგოგი, საზოგადო მოღვაწე ჰენრიკ ჰრინევსკი. ჰრინევსკის დიდი ღვაწლი მიუძღვის ქართველი პროფესიული მხატვრების პირველი თაობის ჩამოყალიბებაში. იყო ახლადგახსნილი თბილისის სამხატვრო აკადემიის პირველი პროფესორთაგანი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 389; სააგენტო "პრაიმტაიმი": news