ბარბარე ბებუთაშვილი-გაბუნია

დაბადების ადგილი: ქ. პეტროგრადი, რუსეთი.

ზოგადი განათლება საფრანგეთში, პარიზში მიიღო. დაამთავრა პეტროგრადის "ხელოვნებათა წამახალისებელი სკოლა" (школа поощрения художеств) 1912 წელს; 1914-1919 წწ. სწავლობდა პარიზში, ჟულიენის აკადემიაში.

1913 წლიდან მონაწილეობდა გამოფენებში, მათ შორის - ლენინგრადში ახალგაზრდა მხატვრების ასოციაციისა და დობიჩინის მიერ გამართულ გამოფენებში. 1920 წელს გამოფინა სურათები (უმთავრესად პასტელით შესრულებული) "მცირე წრეში" ("Малый круг"). ქართველ მხატვართა საზოგადოების დაარსებიდან იყო მისი წევრი. მისი ნახატებიდან აღსანიშნავია: პეტრე მელიქიშვილის პორტრეტი (პასტელი, თბილისის სახელმწიფო უნივერსიტეტი); პეიზაჟები - "ძველი ტფილისი", "მომავალი ტფილისი" (მაშინდელი თბილისის მუნიციპალური მუზეუმი); პორტრეტები - კომპოზიტორი ზაქარია ფალიაშვილი, მსახიობი ე. აბაშიძე (მაშინდელი თბილისის თეატრალური მუზეუმი), გალაკტიონ ტაბიძე, იოსებ იმედშვილი, "მეუღლის პორტრეტი", "მამის პორტრეტი", "მზარეული ქალი", "სახლი გორში, სადაც დაიბადა სტალინი", დრამატული მსახიობის, ვადიმოვის პორტრეტი (პასტელი, დრამატურგ ბელიაევის "Путанница"-ს გმირის როლში; მოსკოვის თეატრალური მუზეუმი) და სხვ. მისი ფერწერული ნახატები შეძენილი აქვთ სსრკ ხალხთა მუზეუმს, თბილისის მუზეუმებსა და საქართველოს სახელმწიფო გალერეას. ფერმწერი, პასტელისტი. (სხვა ცნობით დაიბადა 1894 წლის 18 ივლისს). ბარბარე ბებუთაშვილი-გაბუნიას ფოტოკოლექცია საქართველოს ეროვნულ არქივში 1960-იანი წლებიდან ინახება. მწერალ და ქველმოქმედ დავით იოსების ძე ბებუთაშვილის შვილი.

წყარო: ქართველ მოღვაწეთა ლექსიკონი:1801-1952: ტ.I/იოსებ იმედაშვილი -თბ.,2018.-გვ.344