დიმიტრი მარღანია

დიმიტრი მარღანია აფხაზური ეკლესიის ცნობილი მღვდელმსახური იყო. ერთადერთი აფხაზთა შორის, რომელსაც პროტოდეკანოზის სასულიერო წოდება მიენიჭა. იგი ცნობილი იყო პედაგოგიური და ლიტერატურული მოღვაწეობით, აფხაზურ ენაზე თარგმნიდა მართლმადიდებლურ, საღვთისმსახურო წიგნებს. პირველმა თარგმნა აფხაზურად "ვეფხისტყაოსანი", ამის გარდა მას ეკუთვნის სკოლებისათვის დიდაქტიკური ხასიათის, ასევე სოფლად სხვადასხვა სახის მეურნეობის სწორად წარმართვისათვის პოპულარული სახელმძღვანელოები, ასევე რუსული სახელმძღვანელოების თარგმანები. საბჭოთა ხელისუფლების დამყარების და ეკლესიების განადგურების შემდეგ დიმიტრი მარღანია ოჩამჩირის სკოლაში აფხაზურ ენას ასწავლიდა. მიღებული ჰქონდა მრავალი ჯილდო. ნაცნობები და თანამშრომლები პროტოდეკანოზ დიმიტრი მარღანიას იხსენებენ, როგორც პრინციპულ და სამართლიან პიროვნებას. იგი მკაცრად ეპყრობოდა ყველას, ვინც სამსახურებრივ თუ მორალურ ვალდებულებებს არღვევდა, ყოველთვის იცავდა ადგილობრივი მოსახლეობის კულტურულ-საგანმანათლებლო ინტერესებს. პეტრე და კონდრატე (კონსტანტინე) მარღანიების მამა.

წყარო: აფხაზი არისტოკრატები ემიგრაციაში = Abkhazian aristocracy in exile / ნატო მარშანია.,თბილისი, 2020. გვ.234