აკაკი ბელიაშვილი

დაბადების ადგილი: სოფელი ქორეთი, ახლანდელი საჩხერის რაიონი.

დაამთავრა ქუთაისის ქართული გიმნაზია. 1921 წლიდან სწავლობდა თბილისის პოლიტექნიკურ ინსტიტუტში. გიმნაზიაში სწავლის დროს ბელიაშვილი ხელნაწერ ჟურნალებში აქვეყნებდა პატარა მოთხრობებს, მინიატურებსა და პიესებს. 30-იანი წლებიდან ხელი აიღო ფორმალისტურ ძიებებზე. თავის ნაწარმოებებში (მოთხრობათა კრებულები: 1933, 1935, 1937) ბელიაშვილი ქართველი ხალხის ყოფასა და შრომას წარმოსახავს; სატირულ-იუმორისტულ მოთხრობებში "მეზობლები" (1935), "უცნობი" (1936), "ქსენოფონტეს გასაჭირი" (1936),"იუსტინეს ხაფანგი" (1938), "მამონას ცდუნება" (1940) და სხვა, მწერალი ამხელს წარსულის გადმონაშთებს, დასცინის მავნე ჩვევებს, მომხვეჭელობასა და მეშჩანობას. ბელიაშვილის უმნიშვნელოვანესი ნაწარმოებია სამტომიანი ისტორიული რომანი "თავგადასავალი ბესიკ გაბაშვილისა" (1945-1948), რომლშიც გამოჩენილი პოეტის მხატვრულ ბიოგრაფიასთან ერთად წარმოდგენილია XVIII საუკუნის საქართველოს საზოგადო-პოლიტიკური ცხოვრება. რომანში ასახულია რთული და ტრაგიკული სამყაროს ეპოქა, როცა მაჰმადიანური სამყაროს მოძალეობის გამო ერეკლე II იძულებული გახდა ერთმორწმუნე რუსეთის მფარველობა ეძია. რომანში "ოქროს ჩარდახი" (წგნ. I, 1952) კვლავ ბესიკის თავგადასავალია გადმოცემული, ოღონდ ახლა უკვე დასავლეთ საქართველოს ისტორიულ მოვლენათა ფონზე. დიდ სამამულო ომში საბჭოთა ხალხის პატრიოტულ სულისკვეთებას და ახალგაზრდობის აღზრდის პრობლემებს ეძღვნება რომანი "უღელტეხილი" (1956). რომანში "ვეფხია ხალიბაური" (ნაწ. 1-2, 1959-1960) ბელიაშვილი ასახავს ქართველ მეტალურგების შრომასა და ყოფას. ჩვენი თანამედროვეობა, ახალგაზრდობის შრომითი საქმიანობა დაედო საფუძვლად რომანს "შვიდკაცა" (1960), რომელიც დაუმთავრებელი დარჩა. ბელიაშვილი კინოდრამატურგიც იყო, მისი სცენარებით შეიქმნა ფილმები: "ცანის ხეობის საუნჯე" (1941), "ისინი ჩამოვიდნენ მთიდან" (1954) და სხვა. მას ეკუთვნის პუბლიცისტური და ლიტერატურულ-კრიტიკული სტატიები. მიღებული აქვს ორი ორდენი.

წყარო: მამულიშვილთა სავანე. - თბ., 1994. - გვ.81

• "ფუტურისტ-ლეფელების" ლიტერატურული დაჯგუფება, წევრი

• თავგადასავალი ბესიკ გაბაშვილისა : რომანი (ავტორი). - თბილისი, მერანი, 1996. - 554გვ.
• ქორწილი სოფელში : მოთხრობები (ავტორი). - თბილისი, საბჭოთა მწერალის გამ-ბა და სტ., 1994. - 81გვ.
• ვეფხია ხალიბაური : რომანი (ავტორი). - თბილისი, საბჭ. მწერალი, 1960. - 432გვ.
• ძალა სიყვარულისა : მოთხრობები და ნარკვევები (ავტორი). - თბილისი, საბჭ. მწერალი, 1957. - 211გვ.
• ოქროს ჩარდახი : რომანი (ავტორი). - თბილისი, საბჭ. მწერალის გამ-ბა და სტ., 1952. - 296გვ.