თენგიზ ბურჭულაძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის მექანიკა–მათემატიკის ფაკულტეტი 1952 წელს. 

1955–1957წწ. - რკინიგზის ტრანსპორტის ინჟინერთა ინსტიტუტის უმაღლესი მათემატიკის კათედრის ასისტენტი; 1957-1958წწ. - ა. რაზმაძის სახელობის მათემატიკის ინსტიტუტის უმცროსი მეცნიერ-თანამშრომელი; 1958-1977წწ. - უფროსი მეცნიერ-თანამშრომელი; 1977-1988წწ. დირექტორის მოადგილე; 1989 წლიდან - მათემატიკური ფიზიკის განყოფილების გამგე; 1965 წლიდან - საქართველოს პოლიტექნიკური უნივერსიტეტის უმაღლესი მათემატიკის კათედრის პროფესორი. ძირითადი მეცნიერული კვლევები ეძღვნება იზოტროპული და ანიზოტროპული დრეკადი გარემოს დრეკადობის, თერმოდრეკადობისა და თერმოდიფუზიის თეორიის სივრცით და ბრტყელ დინამიკურ და სტატიკურ სასაზღვრო ამოცანებს. მის მიერ აგებული სასაზღვრო ამოცანების ამოხსნადობის თეორია საშუალებას იძლევა ფურიეს განზოგადებულ მწკრივებში აიგოს ალგორითმი და ამოხსნის მიახლოებითი ფორმულები, რომლებიც კარგად რეალიზდება ეგმ-ზე. იგი თანაავტორია მონოგრაფიისა, რომელიც შეიცავს დრეკადობის თეორიის მათემატიკური საფუძვლების ანალიზს. არის 130–ზე მეტი სამეცნიერო ნაშრომის ავტორი. მათემატიკოსი და მექანიკოსი. ფიზიკა-მათემატიკის მეცნიერებათა დოქტორი, პროფესორი (1968), აკადემიკოსი.

წყარო: საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.193; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.98

• საქართველოს მეცნიერებათა ეროვნული აკადემია, აკადემიკოსი (1993-2000)

• 1998 - ღირსების ორდენი
  მათემატიკური მეცნიერების განვითარებაში შეტანილი პირადი წვლილის, სტუდენტ-ახალგაზრდობისა და სამეცნიერო კადრების მომზადების საქმეში დიდი დამსახურებისათვის
• 1987 - ილია ვეკუას სახელობის პრემია
• 1985 - საქართველოს მეცნიერებათა დამსახურებული მოღვაწე
• 1971 - საქართველოს სახელმწიფო პრემია, მეცნიერებისა და ტექნიკის დარგში

• ფურიეს მეთოდი დრეკად ნარევთა წრფივი თეორიის დინამიკურ სამგანზომილებიან ამოცანებში (ავტორი) // საქართველოს მეცნიერებათა აკადემიის მოამბე, ტ. 155. - თბილისი, 1997. - გვ.32-37
• განზოგადებული ელასტოთერმოდიფუზიის მათემატიკური ამოცანების თეორიისათვის (ავტორი) // საქართველოს მეცნიერებათა აკადემიის მოამბე, ტ. 153. - თბილისი, 1996. - გვ.190-194
• მექანიკის განვითარება საბჭოთა საქართველოში (ავტორი) // მეცნიერება და ტექნიკა N10. - თბილისი, 1987. - გვ.50-55
• თერმოდრეკადობის ამოცანები შერეული სასაზღვრო პირობებით (ავტორი) // თბილისის მათემატიკის ინსტიტუტის შრომები, ტ. 44. - თბილისი, 1974. - გვ.10-29.
• ზოგიერთი შერეული სასაზღვრო ამოცანა მრავლადბმული არეებისათვის (ავტორი) // თბილისის სახელმწიფო უნივერსიტეტის შრომები, ტ. 110. - თბილისი, 1965. - გვ.79-88