იუსტინე აბულაძე

დაბადების ადგილი: სოფელი როკითი, ბაღდათის რაიონი.

დაამთავრა პეტერბურგის უნივერსიტეტის აღმოსავლური ენების ფაკულტეტი (ქართული-სომხური-სპარსული ფილოლოგიის განხრით) 1900 წელს.

აღმოსავლეთის ფონდების შესასწავლად 1901-1902წწ. იმოგზაურა შუა აზიასა და დასავლეთ ევროპაში, სადაც გაეცნო სპარსული ხელნაწერების კოლექციებს. საქართველოში დაბრუნების შემდეგ მუშაობდა მასწავლებლად, საისტორიო-საეთნოგრაფიო საზოგადოების მუზეუმის გამგედ. იყო საქართველოში სპარსული ენის მეცნიერული სწავლების ფუძემდებელი. 1915-1919წწ. საისტორიო და საეთნოგრაფიო საზოგადოების მუზეუმისა და ბიბლიოთეკის გამგე; 1918 წლიდან თსუ-ში კითხულობდა სპარსული ენისა და ლიტერატურის კურსს. მანვე შეადგინა პირველი სპარსული ენის სახელმძღვანელო ქართულ ენაზე (1936). თბილისის უნივერსიტეტში დააარსა და სათავეში ჩაუდგა სპარსული ფილოლოგიის კათედრას. აღზარდა ქართველ ირანისტთა მთელი თაობა. იკვლევდა "შაჰ-ნამეს", "ვისრამიანს", ორჯერ გამოსცა "ვეფხისტყაოსანი" (1914, 1926) ვრცელი შესავლითა და ლექსიკონით. გამოსცა "შაჰ-ნამეს ანუ მეფეთა წიგნის" ქართული ვერსიები I ტ. (1916), მონაწილეობდა II ტომის მომზადებაში (1934). მანვე დაურთო გამოცემას ლექსიკონი. წერილების სერია მიუძღვნა "ვისრამიანის" ქართულ და სპარსულ ტექსტებს, მონაწილეობდა ამ ძეგლის გამოცემაში (1938), დაურთო ლექსიკონი. დაკრძალეს მწერალთა და საზოგადო მოღვაწეთა დიდუბის პანთეონში; 2015 წლის 18 ნოემბერს მისი ნეშტი თბილისის სახელმწიფო უნივერსიტეტის ეზოში გადაასვენეს. ფილოლოგიის მეცნიერებათა დოქტორი (1938), პროფესორი.

წყარო: მამულიშვილთა სავანე. - თბ., 1994. - გვ.28; ქართული საბჭოთა ენციკლოპედია, ტ. 1. -თბ., 1975. -გვ. 45; კარგ ქართველთა საფლავები: geonecropol.ge; თბილისის სახელმწიფო უნივერსიტეტი: encyclopedia.tsu.ge

• საქართველოს საენათმეცნიერო საზოგადოება , ნამდვილი წევრი
• საქართველოს საისტორიო-საეთნოგრაფიო საზოგადოების გამგეობა, დამფუძნებელი და ნამდვილი წევრი (1907-)
• ქართველთა შორის წერა-კითხვის გამავრცელებელი საზოგადოება, მუდმივი წევრი (1900-1921)

• 1946 - მედალი "1941-1945 წლებში დიდ სამამულო ომში მამაცური შრომისთვის"
• 1943 - საქართველოს მეცნიერებათა დამსახურებული მოღვაწე

• რუსთველოლოგიური ნაშრომები (ავტორი). - თბილისი, თბილ. უნ-ტის გამ-ბა, 1967. - 363გვ.
• სპარსული ენის სახელმძღვანელო : გრამატიკა, ქრესტომათია, ლექსიკონი (ავტორი). - თბილისი, თბილ. უნ-ტის გამ-ბა, 1953. - 265გვ.
• რუსულ-ქართული ლექსიკონი სალიტერატურო, საპოლიტიკო, სატექნიკო და უცხო სიტყვათა და ტერმინთა ჩართვით, ნაწ. 1 (ავტორი). - ტფილისი, ავტორის გამოცემა, 1927. - 708გვ.
• მე-XII საუკუნის ქართული მწერლობის ხასიათი და რუსთველის "ვეფხის-ტყაოსანი" (ავტორი). - თბილისი, სტ. "ძმობა", 1908. - 192გვ.