კონსტანტინე ჭიჭინაძე

დაბადების ადგილი: სოფელი ხიმში, ამბროლაურის რაიონი. 

დაამთავრა თბილისის სამხედრო სასწავლებელი 1916 წელს. ერთხანს სწავლობდა თბილისის სახელმწიფო უნივერსიტეტში. 

1913-1915წწ. მუშაობდა იუსტიციის სამინისტროში მიწის მზომავად; 1916-1918წწ. იყო მე–6 სათადარიგო ბატალიონში პრაპორჩიკი; 1919-1921წწ. - მუშათა და გლეხთა ინსპექციაში რევიზორი; 1921-1923წწ. - რაჭის მაზრის თესვის კამპანიის ხელმძღვანელი; 1924-1925წწ. - ჟურნალ "მნათობის" სტილისტი. ლექსებსა და პოემებს აქვეყნებდა ქართულ ჟურნალ-გაზეთებში. ავტორია რამდენიმე პოეტური კრებულისა. იგი აქტიურად მონაწილეობდა ჟურნალ "კავკასიონში", რომლის გარშემო შემოკრებილნი იყვნენ დ. კლდიაშვილი, ნ. ლორთქიფანიძე, ლ. ქიაჩელი, გ. რობაქიძე, პ. ინგოროყვა და სხვები. პირველი ლექსი 1908 წელს გაზეთ "ივერიაში" გამოაქვეყნა. ქართულად თარგმნა ბაირონის რამდენიმე პოემა, ედგარ პოს, ალექსანდრე პუშკინის, მიხეილ ლერმონტოვის, ალექსანდრე ბლოკის ნაწარმოებები, "ამბავი იგორის ლაშქრობისა", დანტეს "ღვთაებრივი კომედია", I ნაწილი (კ. გამსახურდიასთან ერთად), გერმანული ეპოსი "სიმღერა ნიბელუნგებზე" და სხვა. განსაკუთრებით უნდა აღინიშნოს მისი მნიშვნელოვანი წვლილი რუსთველოლოგიაში. მასვე ეკუთვნის ღრმად მეცნიერული ნაშრომი "ალიტერაცია ქართულ შაირში და ვეფხისტყაოსნის პოემა". მიღებული ჰქონდა სახელმწიფო ჯილდოები. პოეტი, მთარგმნელი, ტექსტოლოგი, რუსთველოლოგი.

წყარო: მამულიშვილთა სავანე. - თბ., 1994. - გვ.410; დიდუბის პანთეონი=Didube pantheon/ბადრი ქუთათელაძე. -თბ., 2025.-გვ.439; კარგ ქართველთა საფლავები: geonecropol.ge

• საქართველოს საბჭოთა მწერლების კავშირი, წევრი (1934-)
• საქართველოს საბჭოთა მწერლების კავშირის პოეტების სექცია, თავმჯდომარე (1944-1948)
• სახელგამის სარედაქციო კოლეგია, წევრი

• მედალი "შრომითი მამაცობისთვის"
• საპატიო ნიშნის ორდენი

• ლექსები და პოემები (ავტორი). - თბილისი, სახელგამი, 1951. - 183გვ.
• შუა აზია : ლექსები (ავტორი). - თბილისი, ფედერაციას გამ-ბა და სტ., 1937. - 46გვ.
• რუსთაველის გარშემო (ავტორი). - ტფილისი, პოლიგრაფსკ. სტ., 1928. - 159გვ.
• რჩეული ლექსები მეორე წიგნიდან (ავტორი). - ტფილისი, პოლიგრაფსკოლის სტამბა, 1927. - 94გვ.
• ალიტერაცია ქართულ შაირში და "ვეფხის ტყაოსანის" პრობლემა (ავტორი). - ტფილისი, გამომცემ. თომა ჩიქვანაია, 1925. - 103გვ.