ვახტანგ გოგოლაძე

დაბადების ადგილი: ქ. რკვია, აზერბაიჯანი.

დაამთავრა თბილისის სახელმწიფო უნივერსიტეტი 1929 წელს; შემდეგ ქ. ლენინგრადის ვ. სტეკლოვის სახელობის მათემატიკის ინსტიტუტის ასპირანტურა.

მუშაობდა ლენინგრადის სეისმოლოგიურ ინსტიტუტში; მოსკოვის ჩარხმშენებელ ინსტიტუტში იყო უმაღლესი მათემატიკის კათედრის გამგე (1947); მოსკოვში დაიცვა ფიზიკა-მათემატიკის მეცნიერებათა ჯერ საკანდიდატო, შემდეგ სადოქტორო დისერტაცია. იგი უშუალოდ მონაწილეობდა მოსკოვში სასტუმრო "მოსკოვის" მდგრადობის გათვლაში; მეორე მსოფლიო ომის დროს მუშაობდა თბილისის სახელმწიფო უნივერსიტეტში და პოლიტექნიკურ ინსტიტუტში. მისი სამეცნიერო კვლევის თემატიკა შეეხება დრეკადობის მათემატიკური თეორიისა და მათემატიკური ფიზიკის საკითხებს; ბოლცმანის იდეის საფუძველზე განავითარა დრეკადობის მემკვიდრეობითობის თეორია, რომელთათვისაც დრეკადობის დინამიკური თეორიის ამოცანები ჩაიწერებიან ინტეგრო-დიფერენციალურ განტოლებებში; ამოხსნა Lamba-Volterra-ს კლასიკური ამოცანა; მოგვცა მრავალგანზომილებიან სივრცეში ტალღის განტოლების ფუნქციონალურ-ინვარიანტული ამოხსნა; დრეკადი მემკვიდრეობის გარემოში შეისწავლა დრეკადი რხევები; არაერთგვაროვანი და ანიზოტროპული გარემოსათვის გამოიყვანა ახალი განტოლება; იკვლევდა თეორიული სეისმოლოგიის საკითხებს. მექანიკოსი, ფიზიკა–მათემატიკის მეცნიერებათა დოქტორი (1945).

წყარო: საქართველო: ენციკლოპედია: ტ.2. – თბ., 2012. – გვ.69; საქართველოს მათემატიკოსები და მექანიკოსები: ბიოგრაფიული ცნობარი/ნოდარ მახვილაძე. -თბ., 2016. -გვ.204