იოსებ ბუაჩიძე

დაბადების ადგილი: სოფელი ფარცხნალი, ხარაგაულის რაიონი (შორაპნის მაზრა). 

დაამთავრა ამიერკავკასიის სამთო-მეტალურგიული ინსტიტუტი 1934 წელს.

მუშაობდა "აჭარჰესის" მშენებლობაზე, 1938 წელს იყო "თბილჰიდროენერგოპროექტის" საინჟინრო–გეოლოგიური განყოფილების გამგე; 1951 წლიდან საქართველოს პოლიტექნიკური ინსტიტუტის პროფესორი, 1954–1974წწ. ჰიდროგეოლოგიური და საინჟინრო გეოლოგიის კათედრის გამგე, 1958–1973წწ. საქართველოს პოლიტექნიკური ინსტიტუტის რექტორი;  საქართველოს მეცნიერებათა აკადემიის ჰიდროგეოლოგიისა და საინჟინრო გეოლოგიური სექტორის დირექტორი; 1973 წლიდან იყო საქართველოს მეცნიერებათა აკადემიის ჰიდროგელოგიისა და საინჟინრო გეოლოგიის სამეცნიერო-კვლევითი სექტორის დირექტორი, 1989 წლიდან დირექტორის მრჩეველი. შეადგინა საქართველოს ჰიდროგეოლოგიისა და საინჟინრო-გეოლოგიის რუკები და დარაიონების სქემები, გამოჰყო საქართველოს ტერიტორიაზე არტეზიული აუზების გავრცელების არეები; ფასდაუდებელია მისი წვლილი თბილისის მეტროპოლიტენის მშენებლობის საინჟინრო-გეოლოგიური დასაბუთების საქმეში. მეტროპოლიტენის პროექტის განხორციელებამ დაადასტურა მის მიერ გამოთქმულ პროგნოზთა სისწორე; მისი ავტორობითა და თანაავტორობით გამოიცა საინჟინრო გეოლოგიასა და ჰიდროგეოლოგიაში 7 მონოგრაფია, მათ შორის ერთი - ინგლისურ ენაზე; გამოქვეყნებული აქვს მეცნიერული შრომები,  აშშ-ს, იტალიის, რუსეთის, უკრაინის, იაპონიის, ინგლისის, გერმანიისა და სხვა ქვეყნების პოპულარულ სამეცნიერო ჟურნალებში; შედგენილი აქვს 200-ზე მეტი დიდი პრაქტიკული მნიშვნელობის მქონე საინჟინრო-გეოლოგიური და ჰიდროგეოლოგიური დასკვნა ქვეყნის სხვადასხვა ტიპის ნაგებობათა მშენებლობის, რეკონსტრუქციისა და მდგრადობის უზრუნველყოფის შენარჩუნების მიზნით; გეოლოგიურ–მინერალოგიურ მეცნიერებათა დოქტორი (1950), პროფესორი (1951).

წყარო: საქართველო: ენციკლოპედია: ტ.I.–თბ., 1997.–გვ.487; საქართველოს ტექნიკური უნივერსიტეტი: gtu.ge; წიგნი ღირსებისა: ტ. 2/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.128; საქართველოს ენერგეტიკოსები=Georgian Power Engineers: ენციკლოპედია.- თბილისი,. 2016.- გვ. 49-52

• საქართველოს მეცნიერებათა აკადემია, წევრ–კორესპონდენტი (1961-)

• 1997 - ღირსების ორდენი
• 1967 - საქართველოს მეცნიერებისა და ტექნიკის დამსახურებული მოღვაწე
• გიორგი ნიკოლაძის სახელობის მედალი