ზაქარია ბერიშვილი

დაბადების ადგილი: ქ. თბილისი.

სწავლობდა თბილისის საქალაქო სასწავლებელში.

1905–1907 წლებში ავჭალის აუდიტორიის მსახიობია, 1907-1909 წლებში კი ქართულ დრამატულ თეატრშია. 1909-1911 წლებში რეჟისორის თანაშემწეა მოსკოვის სამხატვრო თეატრში. 1911-1913 წლებში ქართული დრამატული თეატრის რეჟისორი და მსახიობია. 1913-1915 წლებში  იგი მიიწვიეს რეჟისორად პეტერბურგში კომისარჟევსკაიას სახ. თეატრში. 1915 წელს ზაქარია ბრუნდება საქართველოში და მუშაობას განაგრძობს რეჟისორად ქართულ დრამატულ და ნაძალადევის თეატრში. 1918 წელს  იგი გ. ჯაბადათან ერთად აყალიბებს თეატრალურ სტუდიას. 1920 წელს თბილისის დრამატულ თეატრში დადგა სპექტაკლი "მარიამ მაგდალინელი", რომლის განხორციელება ლადო მესხიშვილმა დაიწყო, მაგრამ მისი გარდაცვალების გამო ზაქარიამ დაასრულა. 1921 წელს მონაწილეობს საქართველოს სსრ განათლების სახალხო კომისარიატის კინოსექციის ჩამოყალიბებაში და მუშაობას იწყებს კინოსტუდიაში მსახიობად და მთავარ ადმინისტრატორად. შესრულებული აქვს ეპიზოდური როლები სხვადასხვა ფილმებში: მამა ("ამერიკანკა"), მათხოვარი ("მამის მკვლელი", 1923), მოურავი ("არსენა ყაჩაღი", 1923), მახნოველი ("წითელი ეშმაკუნები", 1923 ), მეირი ("სამი სიცოცხლე") და სხვა. პირველი კინოსარეჟისორო გაკვეთილები მან მიიღო კოტე მარჯანიშვილისაგან, რომელმაც თანადამდგმელად მიიწვია კინოფილმ "სამანიშვილის დედინაცვალზე". ამ ფილმმა განსაზღვრა მისი რეჟისორული კარიერა. მან დამოუკიდებლად შექმნა ფილმები: "იბრაჰიმი და გოდერძი" (1927), მანვე გადაიღო "ღრუბელთა თავშესაფარი" (1928), "საკანი № 79" (1930), "ტონია ფრონტზე" (1931), "მდინარის გაღმა" (1935), "ცანის ხეობის საუნჯე" (1941), "საკანი 79", "ღრუბელთა თავშესაფარი".

წყარო: საქართველო: ენციკლოპედია: ტ.I.–თბ., 1997.–გვ.403; 2007 წლის საიუბილეო თარიღები: თეატრი, მუსიკა, კინო, ქორეოგრაფია.- თბ., 2007.- გვ.13; ეროვნული ფილმოგრაფია: geocinema.ge

• 1961 - საქართველოს ხელოვნების დამსახურებული მოღვაწე
• 1941 - საქართველოს დამსახურებული არტისტი