იობი (მიტროპოლიტი)

დაბადების ადგილი: სოფელი სნო, ყაზბეგის რაიონი. 

დაამთავრა საქართველოს სახელმწიფო სასოფლო-სამეურნეო ინსტიტუტის ეკონომიკის ფაკულტეტი 1982 წელს; მცხეთის სასულიერო აკადემია.

ინსტიტუტის დამთავრების შემდეგ, სრულიად საქართველოს კათოლიკოს-პატრიარქის, უწმინდესისა და უნეტარესი ილია II-ის ლოცვა-კურთხევით დაინიშნა საქართველოს საპატრიარქოს ეკონომისტად; 1983 წლიდან საქართველოს საპატრიარქოს საფინანსო-სამეურნეო განყოფილების უფროსის მოადგილეა; 1984 წელს გაწვეულ იქნა სამხედრო სამსახურში; დაბრუნების შემდეგ მუშაობა განაგრძო საქართველოს საპატრიარქოში არქივარიუსად; 1985 წელს ჩაირიცხა მცხეთის სასულიერო სემინარიაში; სემინარიაში სწავლის პერიოდში, არდადეგების დროს იყო მორჩილი ბეთანიის მამათა მონასტერში, მარტყოფის საპატრიარქო რეზიდენციაში; 1988 წლის 3 იანვარს სამთავროს მონასტერში წილკნელმა ეპისკოპოსმა ზოსიმემ (შიოშვილი) აღკვეცა ბერად და სახელად უწოდა იობი; იმავე წლის 19 იანვარს, ნათლისღების დღესასწაულზე, სიონის საპატრიარქო ტაძარში უწმინდესმა და უნეტარესმა ილია II ბერი იობი აკურთხა დიაკვნად, ხოლო 28 მარტს მღდვლად; 1988 წლის 22 ივნისს დაინიშნა მარტყოფის მონასტრის წინამძღვრად; 1989 წლის ზაფხულში მონაწილეობდა აჭარაში მისიონერულ მოგზაურობაში; 1989 წლის 3 სექტემბერს აყვანილ იქნა იღუმენის ხარისხში, იმავე წლის ოქტომბერში უწმინდესმა და უნეტარესის ილია II-ის ლოცვა-კურთხევით გადაყვანილ იქნა აჭარაში სხალტის ახალგახსნილ მამათა მონასტერში; 1990 წლის 28 აგვისტოს აყვანილ იქნა არქიმანდიტრის ხარისხში; 1990 წლის სექტემბერში გადაყვანილ იქნა ცხუმ-აფხაზეთის ეპარქიაში, კომანის მონასტერში, მაგრამ ელემენტარული საცხოვრებელი პირობების არქონის გამო იძულებული გახდა დროებით კვლავ თბილისში დაბრუნებულიყო; 1990 წლის ივლისიდან დაინიშნა საქართველოს საპატრიარქოს ახალჩამოყალიბებული სოფლის მეურნეობის განყოფილების თავმჯდომარედ, იმავდროულად, ასრულებდა მარტყოფის ღვთაების მონასტრის წინამძღვრის მოვალეობას; 1992 წლის მაისში საქართველოს მართლმადიდებელი სამოციქულო ეკლესიის წმინდა სინოდის გადაწყვეტილებით არქიმანდიტრი იობი გამორჩეულ იქნა მანგლელ ეპისკოპოსად; 17 მაისს სვეტიცხოვლის საპატრიარქო ტაძარში შესრულდა მისი ეპისკოპოსად კურთხევის წესი; 1992 წლის სექტემბრიდან ეპისკოპოსი იობი დაინიშნა სასულიერო აკადემიისა და სემინარიის პრორექტორად; 1992 წლის 25 დეკემბერს გადაყვანილ იქნა ბათუმ-შემოქმედის ეპარქიის მმართველად და ხულოს სასულიერო სასწავლებლის რექტორად; ეპარქიაში მოღვაწეობის დროს მეუფე იობის ძალიხმევით გაიხსნა მრავალი ეკლესია-მონასტერი, აჭარის მოსახლეობის დიდი ნაწილი დაუბრუნდა ქრისტიანულ სარწმუნოებას; 1995 წლის გაზაფხულზე წმინდა სინოდის გადაწყვეტილებით, ბათუმ-შემოქმედის ეპარქიის გაყოფის შემდეგ ეპისკოპოსი იობი დაინიშნა ბათუმისა და სხალტის ეპისკოპოსად, 1996 წლის 21 ოქტომბრიდან კი ურბნისისა და რუისის ეპარქიის მმართველად და სრულიად საქართველოს კათოლიკოს-პატრიარქის ქორეპისკოპოსად; 1996 წლის 25 დეკემბერს აყვანილ იქნა მთავარეპისკოპოსის, ხოლო 2000 წლის დეკემბერში მიტროპოლიტის ხარისხში; 2003 წელს პირადი განცხადების საფუძველზე გათავისუფლდა ქორეპისკოპოსის თანამდებობიდან და სათავეში ჩაუდგა საპატრიარქოს საღვთისმეტყველო და ლიტურგიკულ კომისიებში.

წყარო: ვინ ვინაა საქართველოში: ქართული ბიოგრაფიული ცნობარი. –  თბ., 1998-1999. - გვ. 159; საქართველოს საპატრიარქოს ვებგვერდი: patriarchate.ge; საზოგადოებრივ-პოლიტიკური გაზეთი "კვირის პალიტრა".-თბილისი,2026.-N18 (1659).-4 მაისი.-გვ.8

• 2007 - წმინდა გიორგის ორდენი