ყაფლან ბარათაშვილი–ორბელიშვილი

ყაფლან ბარათაშვილ-ორბელიშვილი იყო ბარათაშვილთა ერთი შტოს, ორბელიშვილთა(გამოეყო 1536) წარმომადგენელი, ყაფლანიშვილთა გვარის ფუძემდებელი, "დიდი ყაფლანის" სახელით ცნობილი. ქართლის სამეფოს მდივანბეგი(იხსენიება 1634 წლიდან) და სახლთუხუცესი(იხსენიება 1646 წლიდან). 20-იანი წლების დასაწყისში, როდესაც ბარათა ბარათაშვილმა თავისი სახლიკაცები ამოწყვიტა, ბარათაშვილ-ორბელიშვილი ირანში გაიქცა. მონაწილეობდა მარაბდის ბრძოლაში(1625) ირანელთა მხარეზე. ერთგულობდა სიმონ II-ს, როსტომსა და ვახტანგ V–ს რომელთაგან მრავალი ყმა-მამული მიიღო წყალობად. განაახლა ფიტარეთის მონასტერი, ააშენა და ყმებით დაასახლა 61 სოფელი, თავის მემკვიდრეებს დაუტოვა 80-მდე სოფელი. ჰყავდა ხუთი ვაჟი(პაპუნა, ასლანი, ვახტანგი, თამაზი, გიორგი), რომლებიც შემდეგ ქართლის სამეფოს დიდი მოხელეები გახდნენ, და ერთი ქალი როდამი(ვახტანგ V–ის პირველი ცოლი). 

წყარო: საქართველო: ენციკლოპედია: ტ.I.–თბ., 1997.–გვ.354