ალექსანდრე დადიშქელიანი

დაბადების ადგილი: სოფელი ფარი, მესტიის რაიონი.

დაამთავრა პეტერბურგის თავადაზნაურთა სამხედრო სასწავლებელი.

1843 წელს იგი ხანგრძლივი შვებულებით სვანეთში დაბრუნდა და უფროს ძმასთან კონსტანტინესთან ერთად ჩუბეხევის სამფლობელოს განაგებდა; 1857 წელს იგი ირკუსტრში გადაასახლეს (კონსტანტინემ მოკლა ქუთაისის გენერალ-გუბერნატორი ალექსანდრე გაგარინი); თავდაპირველად მსახურობდა ბაიკალის კაზაკთა ცხენოსან ლეგიონში, შემდეგ იყო აღმოსავლეთ ციმბირის გენერალ-გუბერნატორის ნ. მურავიოვ–ამურსკის ადიუტანტი; გადასახლებაში ყოფნის დროს ეწეოდა მეცნიერულ მუშაობას; 1880-1884წწ. პრიამურიეს გენერალ-გუბერნატორის განკარგულებით კორეაში გაიგზავნა; იქ მან დაწერა შრომა კორეის შესახებ, რომელიც 1886 წელს გამოქვეყნდა პეტერბურგში სათაურით: "Краткий очерк современного состояния Корея князя Дадешкелиани, состоящего при Канцелярии Приамурского генерал-губернатора 1885 г.". (მოთავსებულია კრებულში: "Сборник географических, топографических, статистических материалов по Азии". Вып. XXII, Спб, 1886. გვ.: 61-118). ამ შრომას დართული აქვს კორეის რუკა. აქვე 1888 წელს გამოქვეყნდა მეორე შრომაც ამურის ოლქის შესახებ. ორივე შრომა გასაიდუმლოებულ იქნა. ალექსანდრე დადიშქელიანი შორეული აღმოსავლეთისა და კორეის თვალსაჩინო მოგზაურ-მკვლევარია. იგი პირველი ქართველია, რომელმაც ამ მხარეების გეოგრაფიუილი აღწერა მოგვცა. კორეის გეოგრაფიული, პოლიტიკური და ისტორიული მიმომხილველი, რუსეთის იმპერიის არმიის გენერალ–მაიორი (1874).

წყარო: საქართველო: ენციკლოპედია: ტ.2. – თბ., 2012. – გვ.257; ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.97; ქართველ მოღვაწეთა ლექსიკონი, 1801-1952: ტ. I ა-დ / იოსებ იმედაშვილი.-თბ.,2018.-გვ.788

• წმინდა ვლადიმირის ორდენი
• წმინდა სტანისლავის ორდენი
• წმინდა ანას ორდენი