ანტონი

ანტონი იყო XVIII საუკუნის I ნახევრის ქართველი საეკლესიო მოღვაწე, გენათელი მიტროპოლიტი, დიპლომატი. დაიბადა და აღიზარდა საქართველოში. XVIII საუკუნის 10–იან წლებში არქიმანდრიტი ანტონი მოსკოვის ქართულ ახალშენში მეფე არჩილ II–ის კარზე მოღვაწეობდა. იყო რუსეთის სამეფო კარის მიერ 1716 წელს სპარსეთში გაგზავნილი მისიის წევრი, რომელსაც ა. პ. ვოლინსკი მეთაურობდა. მისიის დამთავრების შემდეგ ანტონი დასავლეთ საქართველოში მოღვაწეობდა, გახდა გენათელი მიტროპოლიტი. 1743–1744 წლებში ანტონი მხლებლებით ჩავიდა რუსეთში საეკლესიო რეფორმისა და ქართველთა ახალშენში მიმდინარე კულტურული მოღვაწეობის გასაცნობად. იღვწოდა ქართული საეკლესიო მწერლობის ძეგლების გასამრავლებლად.

წყარო: საქართველო: ენციკლოპედია: ტ.I.–თბ., 1997.–გვ.169