კონსტანტინე ანდრონიკაშვილი

დაბადების ადგილი: ქ. ყვარელი.

1906–1910 წლებში სწავლობდა პარიზის სორბონის უნივერსიტეტის ფილოლოგიის ფაკულტეტზე. პარალელურად ეუფლებოდა სარეჟისორო ხელოვნებას პარიზის თეატრ "ოდეონის" დრამატულ სტუდიაში (დაამთავრა 1910 წელს) რეჟისორ ა. ანტუანის ხელმძღვანელობით.  1911–1913 წლებში მუშაობდა თბილისის, ქუთაისის, ბათუმის, ჭიათურის, სოხუმის თეატრებში. 1931–1945 წლებში რუსეთის (ნიჟნი–ნოვგოროდი, როსტოვი, ყაზანი, ეკატერინბურგი, სარატოვი და სხვ.) თეატრებში. 1945 წლიდან იყო კოტე მარჯანიშვილის სახელობის სახელმწიფო აკადემიური თეატრის რეჟისორი, პარალელურად ეწეოდა პედაგოგიურ მოღვაწეობას  საქართველოს შოთა რუსთაველის სახელობის თეატრალურ ინსტიტუტში (1945–1954). დადგმული აქვს 60–მდე სხვადასხვა ჟანრის პიესა, მათ შორის, ი. გედევანიშვილის "სინათლე" (1924), ა. სუმბათაშვილის "ღალატი", ა. დიუმას "მარგარიტა გოტიე", ჰ. სენკევიჩის "რუი ბლაზი" (ეკატერინებურგი, 1937), ვაჟა–ფშაველას "მოკვეთილი" (1945), სოფოკლეს "ოიდიპოს მეფე", კ. გუცკოვის "ურიელ აკოსტა" და სხვ. წერდა პიესებს ("სიზმარი კოშკში", "სიყვარულის ყვავილი" და სხვ.). თარგმნა მ. გორკის "უკანასკნელნი", სოფოკლეს "ოიდიპოს მეფე", მოლიერის "გააზნაურებული მდაბიო", ლოპე დე ვეგას "ძაღლი თივაზე" და სხვ. წერდა და აქვეყნებდა წერილებს სასცენო ხელოვნების საკითხებზე. გადაღებულია ფილმში "მამის მკვლელი" (კობა) და სხვ. პროფესორი(1947).

წყარო: საქართველო: ენციკლოპედია: ტ.I.–თბ., 1997.–გვ.152; ქართველ მოღვაწეთა ნეკროპოლი. წ. 1/ შეადგ., წინასიტყვაობა, შენიშვნები და საძიებელი დაურთო სოლომონ ხუციშვილმა. -თბ., 1961. -გვ.17

• 1950 - საქართველოს ხელოვნების დამსახურებული მოღვაწე

• ყვავილი სიყვარულისა : დრამატიული ნაკვეთი 1 მოქმედებად / დაბეჭდილია ქართული დრამატიული საზოგადოების გამგეობის წინადადებით. (ავტორი). - თბილისი, ა.მ. კერესელიძის სტ. , 1912. - 16გვ.
• კ. მესხი ანდრონი, კონსტ. [ანდრონიკაშვილი, კონსტანტინე] : ბიოგრაფიული ეტიუდი (ავტორი). - თბილისი, ბ. კილაძის სტ. , 1910. - 12გვ.