მიქელ პატარიძე

დაბადების ადგილი: ქ. ქუთაისი.

სწავლობდა პეტერბურგის პოლიტექნიკურ ინსტიტუტში.

თებერვლის რევოლუციის შემდეგ დაბრუნდა საქართველოში და აქტიურად ჩაება საზოგადოებრივ ცხოვრებაში, წერს ლექსებს, სიმღერებს, ნარკვევებს და ეწევა მთარგმნელობით საქმიანობას; წლების მანძილზე გვერდში ედგა გიორგი ნიკოლაძესა და მის თანამოაზრეებს იმ დიდ წამოწყებაში, რომელსაც ისინი ეწეოდნენ ერის ფიზიკური გაჯანსაღებისათვის; იყო შესანიშნავი ათლეტი, ტანმოვარჯიშე და ალპინისტი; საზოგადოება "შევარდენი", სადაც ეს ენთუზიასტები გაერთიანდნენ, წმინდა სპორტულის გარდა, დიდ კულტურულ-საგანმანათლებლო მისიასაც ასრულებდა; სწორედ მათ უნდა ვუმადლოდეთ ისეთი სპორტული ტერმინების შექმნას როგორებიცაა: ორძელი, ტაიჭი, ბადრო, თხილამური, წერაყინი, განმკლავი, ზემკლავი, მიმკლავი, აღმატრიალა და სხვანი; პარალელურად ეწეოდა ჟურნალისტურ და ლიტერატურულ მოღვაწეობასაც; მართალია, მისი უპირველესი სიყვარული მთელი სიცოცხლის მანძილზე პოეზია იყო, მაგრამ მრავალმხრივი ნიჭისა და პრაქტიკული საქმიანობის გამო აქ ჯეროვანი კვალი ვერ დატოვა, რასაც მწვავედ განიცდიდა; მისმა პოეტურმა ტალანტმა გამოსავალი ძირითადად თარგმანებში ჰპოვა; მწერალმა დაგვიტოვა რუსული პოეზიის პირველხარისხოვანი თარგმანები - პუშკინი, ლერმონტოვი, ბლოკი ბალმონტი, ესენინი, სურკოვი, სვეტლოვი და სხვები; მანვე გააცნო ქართველ მკითხველს შევჩენკო, ფრანკო, ბაჟანი, მიცკევიჩი, ხეთაგუროვი; აღსანიშნავია აგრეთვე მის მიერ ფრანგულიდან ნათარგმნი რონსარის, ჰიუგოს, ბოდლერის, ვერლენის, როლანის, ვალერის, რემბოს ცალკეული პოეტური ნიმუშები; განსაკუთრებით უნდა აღინიშნოს მისი დამსახურება ვ. მაიაკოვსკის თარგმნის საქმეში, რასაც მან 30 წელი შეალია; ასევე დიდი ღვაწლი დასდო გამოჩენილი რუსი პოეტის სახლ-მუზეუმს ბაღდათში სადაც იგი 17 წელი მუშაობდა და აქედან ბოლო 15 წელი დირექტორი იყო. დამწერლობათმცოდნის, ანბანთმცოდნისა და ქართული ანბანის რაინდის რამაზ პატარიძის მამა.

წყარო: მამულიშვილთა სავანე. - თბ., 1994. - გვ.299; მემატიანე: mematiane.ge

• ქართული ლექსი: XX საუკუნე : პოეზიის ანთოლოგია (თანაავტორი). - თბილისი, დიოგენე, 2015. - 544გვ.. - ISBN: 9789941115110
• ჰაიავატას სიმღერა/ჰენრი უორდსვორტ ლონგფელო (მთარგმნელი). - თბილისი, საქ. ალკკ ცკ, საბავშვო და ახალგაზრდობის ლიტგამომც-ბა, 1938. - 146გვ.
• იერიშები ევერესტზე = Борьба за Эверест (მთარგმნელი). - თბილისი, საქ. კპ(ბ) ცკ. გამომცემლობა, 1937. - 332გვ.
• ტროფეები : ლექსები /ხოზე-მარია დე-ჰერდია (მთარგმნელი). - ტფილისი, ფედერაცია-ს გა-მა და სტ., 1936. - 158გვ.
• ლექსები/სერგეი ესენინი (მთარგმნელი). - ტფილისი, საქართველოს წითელი ჯვრის სტ., 1926. - 31გვ.