შალვა მიქელაძე

დაბადების ადგილი: ქ. ქუთაისი.

დაამთავრა ნოვოროსიის (ოდესა) უნივერსიტეტის სამედიცინო ფაკულტეტი 1907 წელს.

1926-1930წწ. იყო თბილისის სახელმწიფო უნივერსიტეტის სამკურნალი ფაკულტეტის კერძო პათოლოგიისა და თერაპიის კათედრის გამგე; 1930-1935წწ. თბილისის სახელმწიფო სამედიცინო ინსტიტუტის შინაგან სნეულებათა დიაგნოსტიკის კათედრის გამგე; 1935-1938წწ. ამავე ინსტიტუტის  შინაგან სნეულებათა პროპედევტიკის, პარალელურად ექიმთა დახელოვნების თერაპიის (1935-1938) კათედრების გამგე; პირველი ქართული საექიმო ჟურნალ "ექიმის" რედაქტორი (ს. ვირსალაძესთან ერთად, 1919); ჟურნალ "თანამედროვე მედიცინის" ერთ-ერთი დამაარსებელი და სხვა; შეისწავლიდა სოციალური ჰიგიენის, გასტროენტეროლოგიის, კურორტოლოგიის, ნივთიერებათა ცვლის პათოლოგიის საკითხებს. იგი იყო 2 სახელმძღვანელოს (1935, 1938) და 1 მონოგრაფიის "კლინიკური ანალიზები"-ს  ავტორი. მან პირველმა აღწერა საქართველოში Q (ქიუს) ცხელება. თერაპიული სკოლის ერთ-ერთი ფუძემდებელი საქართველოში. მედიცინის მეცნიერებათა დოქტოტი (1924), პროფესორი (1930). ხელი აქვს მოწერილი 1918 წლის 26 მაისს მიღებულ საქართველოს დამოუკიდებლობის აქტზე; დააპატიმრეს 1938 წლის აგვისტოში, ჯერ დახვრეტა მიუსაჯეს, შემდგომ 10 წლიანი პატიმრობით შეუცვალეს სასჯელი; სასჯელს ქ. ორიოლის (მოსკოვთან ახლოს) იხდიდა; ორიოლის მახლობლად, დათვების ტყეში დახვრიტეს 169 პატიმართან ერთად 1941 წლის 11 სექტემბერს; 1991 წლის 11 მაისს იქ მემორიალური დაფა აღმართეს. თბილისში არის მისი სახელობის ქუჩა. რეპრესირებული, სიკვდილის შემდეგ რეაბილიტირებული. 

სადოქტორო დისერტაციის თემა - "მასალები სისხლის წებოვნებისა და შედედების თვისებების შესასწავლად მალარიის დროს", დაიცვა 1924 წელს.

წყარო: თბილისი: ენციკლოპედია.- თბ., 2002. - გვ.681; კომპანია "ავერსი": aversi.ge; საქართველოს სამედიცინო კალენდარი: ნაწ.I : 2 ნაწილად / ჯუმბერ ქორჩილავა.-თბ.,2010.-გვ.573-574; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge

• საქართველოს ეროვნული საბჭო (საქართველოს პირველი რესპუბლიკის პარლამენტი), წევრი (1918-)
• საქართველოს ეროვნული საბჭოს წევრი და სამანდატო საბჭო (საქართველოს პირველი რესპუბლიკის პარლამენტი), თავმჯდომარე (1918-)