ვასილ პეტრიაშვილი

დაბადების ადგილი: სოფელი წალასყური, ახლანდელი გარდაბნის მუნიციპალიტეტი.

დაამთავრა თბილისის სასულიერო სემინარია და ჩაირიცხა ნოვოროსიის (ოდესა) უნივერსიტეტის იურიდიულ ფაკულტეტზე; დაინტერესდა ქიმიით და იმავე წელს გადავიდა ფიზიკა-მათემატიკის ფაკულტეტის საბუნებისმეტყველო განყოფილებაზე (დაამთავრა 1870 წელს).

1870 წლიდან, უნივერსიტეტის დამთავრების შემდეგ, მუშაობას იწყებს იქვე, ტექნიკური ქიმიის კათედრაზე; 1905-1907წწ. იყო ნოვოროსიის უნივერსიტეტის ფიზიკა-მათემატიკის ფაკულტეტის დეკანი; ამავე უნივერსიტეტის რექტორი (1907); 1870 წლიდან მუშაობდა ორგანული ქიმიის დარგში. მისი შრომებიდან განსაკუთრებით მნიშვნელოვანია ოქსი- და დიოქსიმალონმჟავათა აღნაგობის დადგენა; დაინტერესებული იყო სასოფლო-სამეურნეო პროდუქტების ტექნოლოგიისა და აგროქიმიის საკითხებით; მას ეკუთვნის ფუნდამენტური ნაშრომი "ძმრის წარმოება" და მრავალი სამეცნიერო სტატია მევენახეობისა და მეღვინეობის საკითხებზე; თანამშრომლობდა ქართულ პერიოდულ პრესაში, გაზეთ "დროებაში"; აქვეყნებდა პუბლიცისტურ წერილებს პოლიტიკურ, სოციალურ და ეკონომიკურ საკითხებზე; ეწეოდა მეცნიერების პოპულარიზაციას. მას ეკუთვნის ბელეტრისტიული ნაშრომებიც; ურთიერთობა ჰქონდა მრავალ ქართველ მოღვაწესთან - ა. წერეთელთან, ი. გოგებაშვილთან, ნ. ნიკოლაძესთან, ს. მესხთან და სხვა. თბილისში არის ვასილ პეტრიაშვილის ქუჩა; აგროქიმიის ერთ-ერთი ფუძემდებელი საქართველოში; პროფესორი (1879).

წყარო: თბილისი: ენციკლოპედია.- თბ.,2002.- გვ.738; ქართული საბჭოთა ენციკლოპედია:ტ. 8.-თბ.,1984.-გვ. 46; cyc.ge

• რძე და მისი სხვა-და-სხვა გვარად გამოყენება (შემდგენელი). - ტფილისი, წიგნის გამომცემელ-ქართველთა ამხანაგობის გამოცემა, 1898. - 486გვ.
• ვაზი, მისი მოშენება და მოვლა : თხზულება ვასილ პეტრიაშვილისა (ავტორი) // წიგნაკი 2. - ქუთაისი, იაფ-ფასიანი სამეურნეო წიგნების თანხის გამოცემა , 1897. - 48 გვ.
• ვაზი, მისი მოშენება და მოვლა : თხზულება ვასილ პეტრიაშვილისა (ავტორი) // წიგნაკი I. - ქუთაისი, იაფ-ფასიანი სამეურნეო წიგნების თანხის გამოცემა , 1896. - 34 გვ.
• ღვინის დაყენება (შემდგენელი). - ტფილისი, ქართველთა ამხანაგობის გამოცემა , 1895. - 544გვ.