იოანე ტარიჭისძე

იოანე ტარიჭისძეს ანტონ I-ის  "წყობილსიტყვაობაში" (XVIII ს.)  ეძღვნება ორსტროფიანი იამბიკო,  რომელშიც ნათქვამია: იოანე ტარიჭისძემ "გჳთარგმნნა წიგნნი, შეგჳმკო ეკლესია", საქართველოში "სწავლა განჰფინა". "ქართლის ცხოვრების" ერთ-ერთი ნუსხის გვიანდელი მინაწერის მიხედვით, რომელიც სულხან-საბა ორბელიანს  ეკუთვნის, იოანე ტარიჭისძე საზღვარგარეთ მოღვაწეობდა და დაახლოებით 1114 წელს დაბრუნდა საქართველოში თეოფილე ხუცესმონაზონთან და არსენ იყალთოელთან  ერთად. კორნელი კეკელიძე იოანე ტარიჭისძეს ნეოპლატონიკოსად მიიჩნევს და მიაწერს ამონიოს ერმისის ორი თხზულების თარგმანს, რომებსაც სხვა მკვლევრები (ს. გორგაძე და ი. ლოლაშვილი) იოანე პეტრიწს  მიაკუთვნებენ. გამოთქმულია მოსაზრება, რომ აღორძინების ხანის მწერლებს შეიძლება ერეოდეთ იოანე ტარიჭისძე იოანე პეტრიწში.

წყარო: ქართული საბჭოთა ენციკლოპედია: ტ. 5.- თბ., 1980.- გვ. 192