ფილიპე

სინას მთაზე ხელნაწერებში დაცულია მისი ერთადერთი ღვთისმშობლისადმი მიძღვნილი აკროსტიქული იამბიკო, რომლის კიდურწერილობაა: "ფილიპე ბეთლემი", ესაა ქალწულისაგან ბეთლემში ქრისტეს შობისადმი ხოტბა; საგალობელი ყურადღებას იქცევს საზომის თვალსაზრისით; შედგება 13 ტაეპისაგან, თითოეული ტაეპი შეიცავს 16 მარცვალს, შაირის საზომს – "ქალწულო, ღვთისმშობელო, დედოფალო, ბეთლემო" – და ამდენად, სტრიქონები თითქოს ერითმება კიდეც ერთმანეთს; ცხადია, ეს არ არის რუსთაველისებური 16–მარცვლოვანი საზომის ჩამოყალიბებული სახე, მაგრამ აშკარაა, რომ იამბიკოში დასტურდება ამ სალექსო ფორმის ჩანასახი; ეს ზრდის ფილიპე ბეთლემელის საგალობლის მნიშვნელობას ქართული მეტრიკის ისტორიისათვის; ეს საზომი შემდგომში გამოიყენა საერო მწერლობამ; მის იამბიკოს სინას მთის ხელნაწერებში მიაკვლია ნ. მარმა, მანვე გამოსცა პირველად ტექსტი (1910); პ. ინგოროყვას აზრით ფილიპე ბეთლემელს მონაწილეობა მიუღია პალესტინის სკოლის საწელიწადო იადიგარის შედგენაში; X საუკუნის ქართველი ჰიმნოგრაფი.

წყარო: ქართული მუსიკის ენციკლოპედიური ლექსიკონი. – თბ., 2015. – გვ. 466; ქართული საბჭოთა ენციკლოპედია, ტ. 10. - თბ., 1986.  -გვ. 302; ქართველი პოეტები : ენციკლოპედია / შეადგინა ალექსანდრე ელერდაშვილმა.- თბ.,2021.-გვ.305