ერნსტ ვერნერ სიმენსი

დაბადების ადგილი: ქ. ლენტე, გერმენია.

დაამთავრა ბერლინის საარტილერიო-საინჟინრო სასწავლებელი 1838 წელს, სადაც ოფიცრის წოდების მიღებასთან ერთად დაეუფლა მათემატიკას, ფიზიკას და ქიმიის მეცნიერებებს.

1842 წელს ელექტროტექნიკის დარგში თავისი გამოგონებისათვის პირველი პატენტი მიიღო. ბერლინში დააარსა საიმპერიო ფიზიკა-ტექნიკური ინსტიტუტი და "პატენტების საზოგადოება". სიმენსი დაინტერესდა ახალი სატელეგრაფო აპარატების შექმნით და სატელეგრაფო ხაზების მშენებლობით; 1847 წელს ინჟინერ- მექანიკოს იოჰან გეორგ ჰალსკესთან ერთად ბერლინში გახსნა პატარა საწარმო "სიმენსი და ჰალსკე", რომელშიც შემდეგ მსხვილი საწარმო - ფირმა "სიმენსი" გახდა. გაიყვანა პირველი სატელეფონო ხაზი ბერლინსა და ფრანკფურტს შორის, შემდეგ - ბელგიასა და რუსეთში; 1874 წლიდან კი - ევროპასა და ამერიკას შორის; 1860 წელს მისი თაოსნობით თბილისში გაიხსნა "სიმენსი და ჰალსკეს" წარმომადგენლობა, რომელსაც სათავეში ჩაუდგა ვერნერის ძმა ვალტერი; 1865 წელს ის საქმიანობის გასაფართოებლად თბილისში ჩამოვიდა; 1870 წლის 11 იანვარს მისი თაოსნობით თბილისში ინდოეთ-ევროპის სატელეგრაფო სადგური გაიხსნა. ამ დროიდან დაიწყო ევროპისა და აზიის ქვეყნებს შორის სატრანზიტო დეპეშების გაცვლა თბილისზე გავლით. თბილისი საერთაშორისო კავშირის უმნიშვნელოვანეს ცენტრად იქცა; 1890 წელს ხანდაზმული ე. სიმენსი თავისი ოჯახის წევრებთან ერთად მესამედ და უკანასკნელად ჩამოვიდა თბილისში, სადაც მისი ორი ძმა - ვალტერ და ოტო ცხოვრობდნენ და მოღვაწეობდნენ. ავტობიოგრაფიულ წიგნში "ჩემი მოგონებები", რომელიც გერმანიაში 21-ჯერ გამოიცა, იგი აღწერს თბილისს, მის თავისებურებებს და მას "აზიურ პარიზად" მოიხსენიებს. 

წყარო: თბილისი: ენციკლოპედია.- თბ., 2002. - გვ.829; ბიზნესი და მენეჯმენტი - ჟურნალი ბიზნესისა და მართვის ხელოვნების შესახებ: aaf.ge; სპუტნიკი-საქართველოს ვებგვერდი: sputnik-georgia.com; 100 ღირსსახსოვარი სახელი = 100 памятных имен = 100 memorable names : საქართველოში და საქართველოს გარეთ მოღვაწე უცხოელები / სარედ. კოლ.: მარიამ ლორთქიფანიძე, როინ მეტრეველი, ზურაბ აბაშიძე [და სხვ.] .- თბ., 2014.-გვ. 241-242

• ბერლინის მეცნიერებათა აკადემია, წევრი