ვანო მჭედლიშვილი

დაბადების ადგილი: სოფელი კაკაბეთი, საგარეჯოს რაიონი.

1923-1924წწ. კაკაბეთში ჩამოაყალიბა ახალგაზრდა მომღერალთა ანსამბლი და სწორედ აქედან დაიწყო მისი, როგორც ლოტბარის, ბიოგრაფია; სიმღერით გატაცება და მახვილი სმენა ხელს უწყობდა დასავლეთ საქართველოს, კერძოდ კი, გურული რთული სიმღერების შეთვისებაში; ამ მხრივ იგი მართლაც უნიკუმი იყო, ამიტომაც ბავშვობაშივე ჰყავდა მომღერალთა გუნდი; 1929 წელს საქართველოს მეორე რესპუბლიკურ ოლიმპიადაზე ვ. მჭედლიშვილი უკვე თავისი გუნდით წარსდგა და ჟიურის საუკეთესო შეფასება დაიმსახურა; 1930 წელს მიხო ჯიღაურთან ერთად იმოგზაურა მოსკოვ-ლენინგრადში და ფირფიტაზე ჩაწერა რამდენიმე სიმღერა; 1940 წლიდან გადაყვანილ იქნა საქართველოს სიმღერისა და ცეკვის სახელმწიფო ანსამბლში და სწორედ აქ გამოჩნდა მისი, როგორც ლოტბარის, არაჩვეულებრივი ნიჭი; მეშვიდე რესპუბლიკურ ოლიმპიადაზე წარსდგა მცხეთის კულტურის სახლთან არსებული ანსამბლით, აქვე გამოიყვანა საგარეჯოს კულტურის სახლის ანსამბლი; 1954 წლის მერვე რესპუბლიკურ ოლიმპიადაზე მცხეთის, საგარეჯოსა და კაჭრეთის სარაიონო გუნდებს ხელმძღვანელობდა; მან პირველად ააჟღერა მთელი რიგი ქართლ-კახური სიმღერებისა, რომლებიც დღემდეა რეპერტუარში; აღსანიშნავია მისი, როგორც სიმღერების შემკრებისა და აღმდგენელის მოღვაწეობა; ფეხით აქვს შემოვლილი ქართლ-კახეთის სოფლები; არ დატოვა არც ერთი სიმღერის მცოდნე, რომლისგანაც სიმღერები არ შეესწავლოს, აღსანიშნავია, რომ მას პროფესიულ-მუსიკალური განათლება არ ჰქონდა მიღებული, ამიტომ ზეპირად უხდებოდა სიმღერის შესწავლა და ასევე ზეპირად გადასცემდა სხვას; მან დაკარგვას გადაარჩინა "ჩაკრულო", "გარეკახური მრავალჟამიერი", "შემოძახილი", "ტურფანი სხედან ჩარდახსა", "შენ, ბიჭო, ანაგურელო"; აღსანიშნავია, რომ ბევრი სიმღერა, პირადად მის მიერ არის დამუშავებული, მაგალითად: "კალოსპირული", "წინწყარო", "არხალალო"; სიმღერების შეკრება-აღდგენისა და დამუშავების გარდა ეწეოდა დიდ პედაგოგიურ მოღვაწეობას; სიმღერებს ასწავლიდა ბავშვებს, ხელმძღვანელობდა გუნდებს; აღზარდა მთელი პლეადა მომღერლებისა - საკმარისია დავასახელოთ ჰამლეტ გონაშვილი, რომლის, როგორც მომღერლის, ჩამოყალიბებაში ვანო მჭედლიშვილს დიდი წვლილი მიუძღვის; ლოტბარი.

წყარო: http://chanting.ge/?page_id=7

• 1951 - საქართველოს ხელოვნების დამსახურებული მოღვაწე
• მედალი "შრომითი მამაცობისთვის"
• მედალი "კავკასიის დაცვისთვის"