ნიკოლოზ მახვილაძე

დაბადების ადგილი: თეთრიწყარო.

დაამთავრა ქ. პეტერბურგის სამხედრო-სამედიცინო აკადემია 1914 წელს.

1914-1916წწ. კავკასიის ფრონტის სამხედრო ნაწილის უფროსი; 1917-1918წწ. თბილისის სამხედრო ჰოსპიტლის ექიმი. 1918-1919წწ. თბილისის პირველი საავადმყოფოს ორდინატორი; 1919-1921წწ. მიიწვიეს ორდინატორად თბილისის სახელმწიფო უნივერსიტეტის სამკურნალო ფაკულტეტის დიაგნოსტიკურ-თერაპიულ კლინიკაში; 1921 წლიდან  თბილისის სახელმწიფო უნივერსიტეტის თერაპიულ კლინიკის უმცროსი ასისტენტია; 1925 წელს მისი თაოსნობით დაარსდა პროფესიულ სნეულებათა პოლიკლინიკა. ამ ბაზაზე 1927 წელს შეიქმნა შრომის ჰიგიენისა და პროფესიულ სნეულებათა სამეცნიერო-კვლევითი ინსტიტუტი, რომლის დირექტორიც იყო გარდაცვალებამდე (1959 წ. ინსტიტუტს მიენიჭა მახვილაძის სახელი). 1930-1936წწ. იყო ჯერ თბილისის სახელმწიფო უნივერსიტეტის, შემდეგ კი თბილისის სამედიცინო ინსტიტუტის სამკურნალო ფაკულტეტის კერძო პათოლოგიისა და თერაპიის კათედრის გამგე; 1936-1938წწ. განაგებდა ექიმთა დახელოვნების ინსტიტუტის შინაგან სნეულებათა კათედრას, ხოლო 1938 წლიდან თბილისის სამედიცინო ინსტიტუტის პროპედევტიკული თერაპიის კათედრას; მან პირველმა გამოთქვა აზრი საქართველოში პელაგრის ენდემურობის და მასთან ბრძოლის აუცილებლობის შესახებ და გ. დიდებულიძესთან ერთად დაასაბუთა (1923) საქართველოში ანკილოსტომიდოზის ენდემურობა; იმავე წელს დაადგინა ბრუცელოზის ენდემურობაც. მან შეისწავლა სამხარეო პათოლოგიური რევმატიზმის, მალარიის კლინიკისა და გავრცელების, ჰიპერტონიული დაავადების პათოგენეზის, დიეთეტიკისა და სხვა საკითხები. თერაპევტი, მედიცინის მეცნიერებათა დოქტორი (1925), პროფესორი (1930).

წყარო: ქართული საბჭოთა ენციკლოპედია: ტ. 6.-თბ., 1983.-გვ.519; საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია; georgianencyclopedia.ge; საქართველო: ენციკლოპედია: ტ.5. -თბ.,2023. -გვ. 623; საქართველოს სამედიცინო კალენდარი: ნაწ.I : 2 ნაწილად / ჯუმბერ ქორჩილავა.-თბ.,2010.-495; საქართველოს სამედიცინო კალენდარი, 2006 წელი / ჯუმბერ ქორჩილავა .-თბ.,2006.-გვ.539-540

• 1941 - საქართველოს მეცნიერებათა დამსახურებული მოღვაწე

• მასალები სისხლის მორფოლოგიის ცვლილებების შესწავლისათვის პელაგრის დროს : კლინიკურ-ჰემატოლოგიური გამოკვლევა [დისერტაცია] (ავტორი). - ტფილისი, ტფილისის უნივერსიტეტის გამოცემა, 1925. - 123გვ.