ელენე ყიფშიძე

დაამთავრა საქართველოს შოთა რუსთაველის სახელობის სახელმწიფო თეატრალური ინსტიტუტი 1948 წელს.

1948 წლიდან კ. მარჯანიშვილის სახელობის სახელმწიფო თეატრის მსახიობია. შექმნა ჰეროიკულ დრამატული და კომედიური სახეები, რომლებიც გამსჭვალულია დიდი შინაგანი სითბოთი, ადამიანურობით, გულწრფელობით, უშუალობით, მგზნებარე ტემპერამენტით, გამოირჩეოდა მუსიკალობითა და დიდი სცენური მომხიბვლელობით. მის მიერ შესრულებული როლებიდან აღსანიშნავია: ნუცკია (მ. მრევლიშვილის "ხარატაანთ კერა"), ლილი (ვ. გაბესკირიას "გაზაფხულის დილა"), ვიოლა (უ. შექსპირის "მეთორმეტე ღამე"), მაია (ვ. კანდელაკის "მაია წყნეთელი"), სონა, კეკელა ("ძველი ვოდევილები"), ფოფია (კ. ბუაჩიძის "ეზოში ავი ძაღლია"), მაგდა (ო. ჩხეიძის "ვისია ვისი?!"), მარგო (ლ. როსებას "პრემიერა") და სხვა; გადაღებულია ფილმებში: "ჩარირამა", "თოჯინები იცინიან", "ბოდიში, თქვენ გელით სიკვდილი", "ასი გრამი გამბედაობისათვის" და სხვა; მონაწილეობდა რადიო და ტელეგადაცემებში. მიღებული ჰქონდა სახელმწიფო ჯილდოები.

წყარო: თბილისი: ენციკლოპედია.- თბ., 2002. - გვ.913; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.67; ეროვნული ფილმოგრაფიის პორტალი: geocinema.ge; დიდუბის პანთეონი=Didube pantheon/ბადრი ქუთათელაძე. -თბ., 2025.-გვ.382; კარგ ქართველთა საფლავები: geonecropol.ge

• 1999 - ღირსების ორდენი
  ქართული თეატრალური ხელოვნების განვითარების, მისი პოპულარიზაციის საქმეში შეტანილი პირადი დიდი წვლილისათვის
• 1973 - საქართველოს სახალხო არტისტი