თალალე (ქართლის კათოლიკოსი)

თალალე, თალილე, ქართლის კათოლიკოსი VIII საუკუნის მეორე ნახევარში. იხსენიება "მოქცევაი ქართლისაის" მატიანეში ცხრა ცოლოსანი კათოლიკოსის შემდეგ. მოვსეს კალანკატუაცის ცნობით, თალალემ ალბანეთის კათოლიკოსის მიქაელის (708–742) სურვილის წინააღმდეგ ალბანეთის მთავარს ვარაზოს, მისსავე ბიძაშვილზე-ვარდანეპზე დაწერა ჯვარი, რის გამოც მიქაელმა თალალე და ახალდაქორწინებულები დაწყევლა. თალალეს მოღვაწეობის ხანაში ქართლის ეკლესია ცდილობდა მონოფიზიტობის აღმსარებელი ალბანეთის მოსახლეობაში ქალკედონური მრწამსის (დიოფიზიტობა) დანერგვას. თალალეს მოქმედება, როგორც ჩანს, ალბანეთის მთავრის ქართლის ეკლესიის გავლენაში მოქცევის სურვილით იყო ნაკარნახევი.

წყარო: საქართველო: ენციკლოპედია: ტ.III.–თბ., 2014.-გვ.453