ელენე ჭუბაბრია

დაბადების ადგილი: ქ. ბათუმი.

სწავლობდა ბათუმის ათწლედში.

წარჩინებულ მოწაფეს სკოლის კედლებშივე აღმოაჩნდა კარგი სმენა და მდიდრული ხმა; შვიდი წლის ასაკიდან გუნდში მღეროდა; 1921 წელს ბათუმში მელიტონ კუხიანიძის ხელმძღვანელობით ჩამოყალიბდა ქართული ხალხური სიმღერის გუნდი, სადაც ელენე ერთ-ერთი წამყვანი მომღერალი იყო. ამ გუნდმა გამარჯვება მოიპოვა სრულიად საქართველოს მომღერალთა გუნდების ოლიმპიადაზე 1929 წელს; ოცდაერთი წლისა იყო ბათუმის მგელაძის სახელობის ათწლედში სიმღერის მასწავლებლი; აქ იგი ხელმძღვანელობდა სასკოლო მომღერალთა გუნდს; ოცდასამი წლის ასაკში გათხოვდა ბათუმის კაპელის ახალგაზრდა მომღერალზე, შემდეგში ცნობილ ვეტერინარზე ვალენტინ (შალვა) ჭუბაბრიაზე; ახალგაზრდა ცოლ-ქმარმა დიდხანს იმღერა კაპელაში; კაპელას ახლდნენ საბჭოთა კავშირის სხვადასხვა ქალაქებში გამართული გასტროლების დროს; მათი მონდომება სანიმუშო იყო კაპელის სხვა მომღერლებისათვის; 1932 წლიდან ელენე ჭუბაბრია უკვე თბილისშია; აქ იგი მიიწვიეს სოლისტად კომპოზიტორ კოტე ფოცხვერაშვილის ხელმძღვანელობით არსებულ აკადემიურ გუნდში, ხოლო მომდევნო წლიდან იგი ავქსენტი მეგრელიძის მეჩონგურეთა ანსამბლის წამყვანი მომღერალია; აქ ჩონგურზე დაკვრას ადვილად დაეუფლა; იგი ხშირად გამოდიოდა საქართველოს რადიოთი; მეჩონგურეთა ანსამბლის წარმატებას ელენე ჭუბაბრიას ვოკალურმა მონაცემებმა დიდად შეუწყო ხელი; პარალელურად, 1936 წელს იგი ალტის პარტიას მღეროდა რადიოკომიტეტთან არსებულ ოთხხმოვან გუნდში, რომელსაც კომპოზიტორი შალვა თაქთაქიშვილი ხელმძღვანელობდა; ამავე წელს მან აქტიური მონაწილეობა მიიღო დასავლეთ საქართველოს სიმღერისა და ცეკვის ანსამბლის მიერ ჩატარებულ წინასადეკადო მუშაობაში, რომლის ორგანიზაცია და ხელმძღვანელობა დაკისრებული ჰქონდა კირილე პაჭკორიას; მან თავისი სოლო სიმღერებით ისახელა თავი, მოსკოვსა და ლენინგრადში; დეკადის შემდეგ სამიოდე წელიწადი იგი კვლავ განაგრძობდა დასავლეთ საქართველოს სიმღერისა და ცეკვის ანსამბლში მოღვაწეობას და ახლდა ანსამბლს საბჭოთა კავშირის სხვადასხვა ქალაქებში გასტროლების დროს; რამდენიმე წლის განმავლობაში იგი ავქსენტი მეგრელიძეს ეხმარებოდა ქართული საკრავების ფართო პოპულარიზაციის საქმეში; ხოლო ათი წელი (1943-1953) იგი სოლისტ მეჩონგურედ მუშაობდა ავქსენტი მეგრელიძის ხელმძღვანელობით არსებულ რადიოკომიტეტის გუნდში; საქართველოს რადიოს ფონდში ინახება მისი ჩვეული გულწრფელობითა და ვირტუოზულობით ნამღერი მეგრული ("ჩელა"), თუ კახური ჩონგურ-ფანდურზე დასამღერებელი სიმღერები; მის მიერ შესრულებულ თითოეულ სიმღერას საკუთარი ინტერპრეტაცია ჰქონდა; ხალხური მომღერალი.

წყარო: მეგრული სიმღერის დედოფალი : ელენე ჭუბაბრია / მოგვითხრობს ანზორ ერქომაიშვილი.-თბ.,2019.-გვ.285; qwelly.com

• 1937 - საპატიო ნიშნის ორდენი
  მოსკოვში 1937 წლის ქართული ხელოვნების დეკადაზე სოლო სიმღერების შესრულებისთვის