გიტო აროშიძე

დაბადების ადგილი: სოფელი ვაკიჯვარი, ოზურგეთის რაიონი.

დაამთავრა თბილისის სახელმწიფო უნივერსიტეტი 1940 წელს(ეკონომიური).

ბავშვობიდანვე გამოჰყვა სიმღერის ნიჭი; ჩავლეიშვილები და სხვა გამოჩენილი მომღერლები მისი ოჯახის ხშირი სტუმრები იყვნენ; ძმები გიტო, ჭიჭიკო და გივი აროშიძეები ერთად მღეროდნენ; რადიოთი ხშირად გადასცემენ მათ მიერ შესრულებულ სიმღერებს; უნივერსიტეტში სწავლის დროს ლევან მახარაძესა და შოთა ორაგველიძესთან ერთად გამოდიოდა; 1938-1940წწ. დასავლეთ საქართველოს სიმღერისა და ცეკვის სახელმწიფო ანსამბლის წევრი იყო და მასთან ერთად მოიარა საბჭოთა კავშირის მრავალი ქალაქი და სამრეწველო ცენტრი; შემდეგ გურიას დაუბრუნდა და იქ მრავალგან(მახარაძეში, ვაკიჯვარში და ლაითურის საბჭოთა მეურნეობაში) ჩამოაყალიბა გუნდები, რომლებთან ერთადაც ხშირად გამოდიოდა სარაიონო და რესპუბლიკურ დათვალიერებებზე და ყოველთვის საპატიო სიგელებსა და ფულად ჯილდოს იმსახურებდა; 1964 წელს ლაითურის საბჭოთა მეურნეობის ანსამბლი სარაიონო დათვალიერებაზე პირველ ადგილზე გავიდა; იმავე წელს რესპუბლიკურ დათვალიერებაზე ანსამბლმა კვლავ წარმატება მოიპოვა; სიმღერების სწორად და დახვეწილად შესრულებისათვის ჟიურიმ პირველი ხარისხის დიპლომი გადასცა, როგორც ანსამბლს ისე მის ხელმძღვანელსაც; 1963 წლიდან გარდაცვალებამდე გიტო აროშიძე ანსამბლ "დილაში" მღეროდა; მან მთელი თავისი ნიჭი და ენერგია ქართულ ხალხურ სიმღერას, მის წინსვლა-განვითარებას შეალია.

წყარო: ხალხური სიმღერის მოამაგენი.-თბ., 2007.-გვ. 48