მერი ვეფხვაძე

1933 წელს მომღერლად ჩაირიცხა მელიტონ კუხიანიძის ხელმძღვანელობით არსებულ აჭარის კაპელაში; ჩონგურზე დაკვრა ვალერიან სადრაძისგან ისწავლა; საკრავს ისე კარგად დაეუფლა, რომ შემდეგ მეჩონგურე ქალთა ანსამბლის ხელმძღვანელი გახდა; ჯერ მუსიკალური შვიდწლედი დაასრულა, შემდეგ 1939 წელს თბილისში საგუნდო-სადირიჟორო კურსები გაიარა; მუშაობდა პედსასწავლებელში, სადაც მუსიკას ასწავლიდა და გუნდსაც ხელმძღვანელობდა, ასევე მასწავლებლის სახლში; კარგა ხანს იყო აჭარის პროფკავშირების სიმღერისა და ცეკვის ანსამბლის ხელმძღვანელი; მრავალი საშეფო კონცერტი გამართა ბათუმსა და მის შემოგარენში; ამავე პერიოდში შექმნა საჩონგურო სიმღერა სამამულო ომის გმირ ისრაფილ ჯინჭარაძეზე; დაამუშავა მრავალი მელოდია, ესენია: "ნანა", "სიმღერა ბათუმზე", "სიმღერა ქართველ გმირებზე"; 1950 წლიდან თბილისში მოღვაწეობდა და უძღვებოდა პირველი ინფექციური საავადმყოფოს გუნდს; მუშაობდა პირველი მაისის რაიონის მედმუშაკთა გაერთიანებული ანსამბლის სამხატვრო ხელმძღვანელად, ასევე კომუნალური მეურნეობისა და ცეკავშირის ანსამბლების ხელმძღვანელად, ანსამბლმა წარმატებით გამართა კონცერტები რიგაში; მისი ინიციატივით შეიქმნა კომუნალური მომსახურების კულტსახლში ვეფხვაძეების ვოკალური კვარტეტი; თავად მღეროდა მასწავლებლის სახლთან არსებულ კაპელაში, თან საშუალო სკოლებში ასწავლიდა სიმღერას.

წყარო: ხალხური სიმღერის მოამაგენი.-თბ., 2007.-გვ. 96

• სამკერდე ნიშანი "სახალხო განათლების წარჩინებული"