რევაზ ხონელიძე

დაბადების ადგილი: ქ. თბილისი.

ცეკვა შეისწავლა თბილისის ორჯონიკიძის სახელობის რაიონის პიონერთა კლუბში მიხეილ რაქვიაშვილის ხელმძღვანელობით. 1943 წელს დაამთავრა თბილისის მე-20 ზოგადსაგანმანათლებლო საშუალო სკოლა და 1950 წლამდე მოცეკვავედ მუშაობდა აღმოსავლეთ საქართველოს სიმღერისა და ცეკვის ანსამბლში, იყო ქორეოგრაფიც; 1950-1961წწ. იყო საქართველოს სიმღერისა და ცეკვის სახელმწიფო ანსამბლის მოცეკვავე მსახიობი და ქორეოგრაფის ასისტენტი. ხელმძღვანელები: დ. ჯავრიშვილი, ავთანდილ თათარაძე, ჯანო ბაგრატიონი. მათთან მუშაობამ დიდი როლი შეასრულა მისი, როგორც ქორეოგრაფის ჩამოყალიბებაში. 1961-1969წწ. მუშაობდა ამიერკავკასიის რკინიგზელის სახლის თვითმოქმედ ანსამბლში პედაგოგ-ქორეოგრაფად. აქ განახორციელა დადგმები: "კიკვიძე", "ნაბდურა", "აზერბაიჯანელ ქალთა ცეკვა" და სხვა. 1968-1975წწ. იყო საქართველოს სიმღერისა და ცეკვის სახელმწიფო ანსამბლის მთავარი ქორეოგრაფი. მრავალი წლის მანძილზე მუშაობდა თბილისის საესტრადო, საცირკო სასწავლებელში პედაგოგად. 

წყარო: ხელოვნების კალენდარი: თეატრი, მუსიკა, კინო.- თბ., 1995. -გვ.40

• 1971 - საქართველოს ხელოვნების დამსახურებული მოღვაწე