ბაკი თუთბერიძე

ბავშვობიდანვე ცდილობდა დაუფლებოდა თავის საყვარელ მუსიკალურ ხელოვნებას; სანდრო კავსაძის ღირსეულ მოწაფეთაგან ერთ-ერთი პირველი ადგილი ნიკოს უნდა მიეკუთვნოს; 1916 წელს სანდრო კავსაძის კონცერტზე, ზესტაფონში მსმენელს განსაკუთრებით მოსწონებია ტრიოს მიერ შესრულებული ნიკო სულხანიშვილის "გახსოვს, ტურფავ", რომელიც გიტარაზე აუჟღერებია ნიკო თუთბერიძეს; მის ლოტბარად ფორმირებაში, სანდრო კავსაძის გარდა, დიდი ღვაწლი მიუძღვით მიხეილ შარაბიძეს, ძმებს მელიტონ და ბართლომე კუხიანიძეებს; მან შეძლო მუსიკალური ცოდნის გაღრმავება  ქუთაისსა და ჭიათურაში; ქართული ხალხური სიმღერის უფროსი თაობის წარმომადგენელმა შთამომავლობას შემოუნახა ბევრი იმერული ხალხური სიმღერა; 1929 წელს ზესტაფონის რკინიგზელთა სკოლაში დაიდგა საბავშვო ოპერები "რწყილი და ჭიანჭველა", "ვინც არ მუშაობს, ის არც ჭამს"(ვინოგრადოვის კრებულიდან) და შალვა თაქთაქიშვილის "პირველი მაისი"(ტექსტი ლადო გეგეჭკორის); ნიკოს მათ დადგმაში ეხმარებოდა სიმღერის მასწავლებელი გიგა ჯუღელი; მომდევნო წელს ფრთა შეესხა მშრომელთა ოცნებას, ზესტაფონში გაიხსნა ქუთაისის მუსიკალური ტექნიკუმის ფილიალი(დირექტორი ნიკოლოზ თუთბერიძე), ხოლო 1932 წელს დაარსდა მუსიკალური ტექნიკუმი, სადაც ის ასწავლიდა საგუნდო ხელოვნებას, თეორიასა და სოლფეჯიოს; მალე ტექნიკუმის მომღერალთა გუნდს სარაიონო დათვალიერებაზე პირველი ადგილი მიეკუთვნა; 1936 წელს როგორც კარგი ინსტრუმენტალისტი შეთავსებით ხელმძღვანელობდა ქუთაისის სიმღერისა და ცეკვის ანსამბლის მეჩონგურეთა ჯგუფს; ორი წლის შემდეგ მას ზესტაფონის სიმღერისა და ცეკვის ანსამბლის ხელმძღვანელობა დაეკისრა; გუნდს რეპერტუარში ჰქონდა როგორც ქართული, ისე მოძმე ხალხების სიმღერები, აგრეთვე საბჭოთა კომპოზიტორების ნაწარმოებები; 1955-1958წწ. ხელმძღვანელობდა ზესტაფონის მასწავლებლის სახლის სიმღერისა და ცეკვის ანსამბლს; საზოგადოებრივ საწყისებზე კონსულტაციას უწევდა რაიონის სასოფლო კლუბების მომღერალთა თვითმოქმედ გუნდებს; მრავალი მისი მოწაფე ცნობილი მოღვაწე გახდა, მრავალიც მომღერალი(ე. ხიჯიკაშვილი, ი. დავითაშვილი), ლოტბარი და მუსიკისმცოდნე; ლოტბარი.

წყარო: ხალხური სიმღერის მოამაგენი.-თბ., 2007.-გვ. 105