გურამ გედევანიშვილი

დაბადების ადგილი: ქ. თბილისი.

დაამთავრა თბილისის რკინიგზის ტრანსპორტის ინჟინერთა ინსტიტუტი ხიდებისა და გვირაბების მშენებლობის სპეციალობით 1959 წელს.

1964-1988წწ. მუშაობდა თბილისის ზონალური ს/კ, ტიპური და ექსპერიმენტული პროექტირების ინსტიტუტის არქიტექტურულ სახელოსნოში მთავარ კონსტრუქტორად და მონოლითური ცენტრის მთავარ ინჟინრად; 1988 წლიდან იყო სამეცნიერო, საპროექტო და სამშენებლო გაერთიანება "საქმონოლითმშენში" მთავარი კონსტრუქტორი, სამეცნიერო მიმართულების ხელმძღვანელი; 1991 წელს დაინიშნა რაჭა-იმერეთის მიწისძვრის შედეგების ლიკვიდაციის კომპლექსის მთავარ კონსტრუქტორად, ხოლო 1993 წელს - სს "მონოლითმშენის" მთავარ ინჟინრად; არის საქართველოში ინდუსტრიული მეთოდებით მონოლითური მშენებლობის და ავარიულ შენობა-ნაგებობათა გამაგრება-გაძლიერების უახლესი მეთოდების ერთ-ერთი დამნერგავი; საავტორო ჯგუფთან ერთად დააპროექტა: ჩერკესკის სახელმწიფო თეატრისა და საქართველოს ფიზკულტურის ინსტიტუტის სამდარბაზიანი შენობები, თექვსმეტსართულიანი მონოლითური საცხოვრებელი სახლები (თბილისში, ქუთაისში), ხუთ და ცხრასართულიანი მონოლითური საცხოვრებელი სახლები (ტიპური პროექტი სერიის ნომრით 153) თბილისში, ესენტუკსა და გელენჯიკში; მისი, როგორც მთავარი კონსტრუქტორის, მონაწილეობით დაპროექტდა ექსპერიმენტული საცხოვრებელი სახლები (მონოლითურ რკინაბეტონში, შიდა ეზოებითა და პანდუსებით), მეორადფასადიანი სახლი წინასწარდაძაბულ კარკასში; მისი ნამუშევრები არის აღწერილი წიგნებში: "საქართველოს არქიტექტურა" (1986წ) და "საცხოვრებელი სახლის არქიტექტურული კომპოზიცია" (1990წ.).

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.129