ზურაბ კირვალიძე

დაბადების ადგილი: სოფელი სხვავა, ამბროლაურის რაიონი.

სწავლობდა თბილისის ინდუსტრიულ ტექნიკუმში; დაამთავრა ხალხური შემოქმედების სახლთან არსებული გუნდების ხელმძღვანელთა გადასამზადებელი კურსები.

ინდუსტრიულ ტექნიკუმში ჩამოაყალიბა გუნდი, რომელშიც სამოცი მოსწავლე მონაწილეობდა; 1943 წელს ხელმძღვანელობდა თბილისის დიმიტროვის სახელობის ქარხნის მუშა-მოსამსახურეთა 150-კაციან მომღერალთა გუნდს; სამი წლის შემდეგ აბრეშუმის ფაბრიკის მომღერალთა გუნდის ხელმძღვანელობა დაეკისრა; მომდევნო წლებში ხელმძღვანელობდა ზოოვეტერინარული ინსტიტუტის, თბილისის სანჰიგიენის სახლის, მაუდ-კამვოლის კომბინატის, თბილისის ფეხსაცმლის გაერთიანება "ისნის" და 124-ე საშუალო სკოლის გუნდებს; ჩვიდმეტი წელი (1945-1962წწ.) საქართველოს ხალხური სიმღერისა და ცეკვის სახელმწიფო დამსახურებული ანსამბლის სოლისტ-მომღერალი იყო და პირნათლად ემსახურებოდა თავის საქმეს; 1947 წლიდან საქართველოს ფილარმონიის სოლისტი იყო და თავის დასთან - ელენე კირვალიძესთან ერთად ფანდურის თანხლებით ასრულებდა როგორც ხალხურ, ისე საკუთარ მელოდიებზე შექმნილ სიმღერებს; შექმნილი აქვს 50-მდე სიმღერა, რომელთაგანაც ბევრს მომღერალთა სხვადასხვა გუნდები ასრულებდნენ; მისი "მწყემსური", "მისალმება", "ქალ-ვაჟის გასაუბრება" სახელმწიფო ანსამბლის რეპერტუარში შედიოდა; 1956 წელს ქ. მოსკოვში გამართულ ქართული ხელოვნებისა და ლიტერატურის დეკადაზე და-ძმა კირვალიძეების მიერ შესრულებულმა სიმღერებმა დიდი მოწონება დაიმსახურა. "მწყემსურის" ნოტები ცნობილმა ამერიკელმა პიანისტმა ვან კლიბერნმა თან წაიღო ამერიკაში; საქართველოს პირველი და მეექვსე საკავშირო ფესტივალის ლაურეატი, ლოტბარი, მომღერალ ელენე კირვალიძის ძმა.

წყარო: ხალხური სიმღერის მოამაგენი.-თბ., 2007.-გვ. 124; ჩვენი რაჭა / ირაკლი დვალი.-თბ.,2008.-გვ.199

• 1962 - საქართველოს დამსახურებული არტისტი
• შრომის ვეტერანის ორდენი