გივი გორგოშიძე

დაბადების ადგილი: ქ. ოზურგეთი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1958 წელს; სსრკ მინისტრთა საბჭოსთან არსებული სახალხო მეურნეობის აკადემია სახალხო მეურნეობის ეკონომიკის, დაგეგმვისა და მართვის ორგანიზაციის სპეციალობით 1983 წელს.

1958-1966წწ. მუშაობდა საქართველოს მშენებლობის სამინისტროს სამშენებლო გაერთიანება "მთავართბილმშენის" N9 სამშენებლო სამმართველოში მშენებელ-ოსტატად, სამუშაოთა მწარმოებლად, უფროს სამუშაოთა მწარმოებლად; 1967 წელს დაინიშნა "მთავართბილმშენის" N9 სამშენებლო სამმართველოს ბიჭვინთის უბნის უფროსად, ბიჭვინთის მაღლივი პანსიონატების საკურორტო კომპლექსის მშენებლობაზე და დიდი წვლილი შეიტანა ამ კომპლექსის მშენებლობის მაღალი ხარისხითა და დროულად დამთავრების საქმეში; 1968-1972წწ. მუშაობდა საქართველოს მშენებლობის სამინისტროს ტრესტ "ორგტექმშენის" ექსპერიმენტული სამმართველოს მთავარ ინჟინრად, ამავე სამინისტროს N10 და N18 სამშენებლო ტრესტების სამმართველოს უფროსად; 1972-1975წწ. იყო საქართველოს კპ ცენტრალური კომიტეტის საქმეთა მმართველობის უფროსი ინჟინერი მშენებლობის დარგში; 1975 წელს გადაიყვანეს საქართველოს სასოფლო მშენებლობის სამინისტროს N11 ტრესტის მთავარ ინჟინრად; 1976-1981წწ. იყო საქართველოს კპ ცენტრალური კომიტეტის საქმეთა მმართველის მოადგილე მშენებლობის დარგში; 1983-1985წწ. მუშაობდა საქართველოს მშენებლობის მინისტრის მოადგილედ; 1986-1986წწ. ამავე სამინისტროს სამრეწველო მშენებლობათა მთავარი საწარმოო განმკარგულებელი სამმართველოს უფროსად; 1986 წელს დაინიშნა საქართველოს განათლების მინისტრის მოადგილედ მშენებლობისა და ეკონომიკის დარგში, სადაც მუშაობდა 1988 წლამდე; 1988 წელს, საქართველოს სახალხო მეურნეობის მართვის ახალი სტრუქტურის თანახმად, რამდენიმე მონათესავე სამინისტროს გაერთიანების შემდეგ, დაინიშნა საქართველოს მინისტრთა საბჭოსთან არსებული ისტორიისა და კულტურის ძეგლთა დაცვისა და გამოყენების მთავარი სამეცნიერო-საწარმოო სამმართველოს უფროსის მოადგილედ; 1995-2005წწ. ხელმძღვანელობდა საქართველოს საგარეო საქმეთა სამინისტროს საფინანსო-სავალუტო და ქონების მართვის დეპარტამენტს; 2005-2010წწ. მუშაობდა შპს "აღმშენებლობის"ტექნიკურ დირექტორად; 2010-2012წწ. იყო შპს "სოგურის" დირექტორი; 2015 წლიდან დაინიშნა გურიის მხარეში სახელმწიფო რწმუნებულის - გუბერნატორის მრჩევლად ინფრასტრუქტურის სფეროში; მინიჭებული აქვს უფროსი მრჩევლის დიპლომატიური რანგი, არის ეკონომიკის მეცნიერებათა აკადემიური დოქტორი, რამდენიმე სამეცნიერო პუბლიკაციის ავტორი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.160-161