ჯუმბერ გოცირიძე

დაამთავრა საქართველოს პოლიტექნიკური ინსტიტუტის ჰიდროტექნიკური ფაკულტეტი 1953 წელს.

მუშაობდა საქართველოს მშენებლობის სამინისტროს სამშენებლო ტრესტ "ამიერკავკასტრანსმშენის" N15 სამშენებლო-სამონტაჟო სამმართველოს ოსტატად, სამუშაოთა მწარმოებლად; 1959 წლიდან იყო იმავე სამმართველოს მთავარი ინჟინერი; 1973 წელს დაინიშნა სამშენებლო ტრესტ "კავკასტრანსმშენის" მმართველის მოადგილედ; 1976 წელს კი იმავე ტრესტის მთავარ ინჟინრად; 1998 წელს - სს "ტრანსმშენის" გენერალურ დირექტორად; მისი ხელმძღვანელობით, როგორც საქართველოში, ისე მის ფარგლებს გარეთ აშენდა მრავალი უნიკალური სატრანსპორტო, ენერგეტიკული, მანქანათმშენებელი და სოციალურ-კულტურული დანიშნულების ობიექტი. მათ შორის: "შაორჰესი", რკინიგზის მეორე ლიანდაგი "თბილისი-სამტრედიის" მონაკვეთზე, ფოთის საზღვაო ვაგზლის კომპლექსი, აეროვაგზალი კოპიტნარში, თბილისის ელმავალმშენებელი, ელექტროვაგონშემკეთებელი და ელექტროტექნიკური ქარხნები, თბილისის საჰაერო, საავტომობილო და სარკინიგზო ვაგზლები, აბასთუმნის ობსერვატორია, მარაბდა-ახალქალაქის ახალი სარკინიგზო მაგისტრალი, ბაკურიანისა და დომბაის საერთაშორისო ახალგაზრდული ბანაკები, მურომის საისრო გადამყვანების ქარხანა, ხარკოვის სამშენებლო კომბინატი, ასტრახანის სარკინიგზო და აზერბაიჯანი-სომხეთის სარკინიგზო-სატრანსპორტო ობიექტები; განხორციელდა სამტრედიის სარკინიგზო კვანძის რეკონსტრუქცია და "მახაჩკალა-გუდერმესის" სარკინიგზო ხაზის ელექტროფიკაცია; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.167-168

• სსრ კავშირის საპატიო მშენებელი
• საქართველოს დამსახურებული მშენებელი