გურამ გუმბერიძე

დაამთავრა საქართველოს პოლიტექნიკური ინსტიტუტი სამშენებლო და საგზაო მანქანებისა და მოწყობილობის სპეციალობით 1960 წელს.

მუშაობდა სამშენებლო ტრესტ "ამიერკავკასტრანსმშენის" სისტემაში; იყო N131 და N243 სამშენებლო სამმართველოს მთავარი მექანიკოსი, მექანიზაციის სამმართველოს უფროსი, ტრესტის მთავარი ენერგეტიკოსი; 1997 წელს დაინიშნა სს "ტრანსმშენის" მექანიზაციის, ტრანსპორტისა და ენერგეტიკის სფეროთა დირექტორად; უშუალოდ მონაწილეობდა თბილისის საჰაერო, საავტომობილო და სარკინიგზო ვაგზლების, მარაბდა-ახალქალაქის ახალი სარკინიგზო ხაზის, მეორე სარკინიგზო ლიანდაგების ელექტროფიცირებაში, დომბაისა და ბაკურიანის ახალგაზრდული საერთაშორისო ბანაკების, თბილისსა და ზესტაფონის რკინიგზის საავადმყოფოების, საცხოვრებელი სახლების მშენებლობაში; თბილისის მეტროპოლიტენის დეპოს, ელმავალმშენებელი და ელექტროვაგონშემკეთებელი ქარხნების რეკონსტრუქციაში; ქ. ლენინაკანის (სომხეთი) მიწისძვრისა და აფხაზეთის საომარი მოქმედებების შედეგად დანგრეულ-დაზიანებული შენობა-ნაგებობებისა და საცხოვრებელი სახლების (სოხუმი) აღდგენაში.

წყარო: საქართველოს არქიტექტორთა და მშენებელთა ენციკლოპედია. 2017.-გვ.172-173; წიგნი ღირსებისა: ტ. 4/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2002. - გვ.288

• 1999 - ღირსების მედალი
  საქართველოში სატრანსპორტო კომპლექსების მშენებლობაში შეტანილი პირადი წვლილისა და მაღალი პროფესიონალიზმისათვის, სტიქიური მოვლენების დროს დაზიანებული შენობა-ნაგებობებისა და აფხაზეთის ომის პერიოდში აღდგენითი სამუშაოების ჩატარებისას გამოჩენილი მაღალი მოქალაქეობრივი პასუხისმგებლობისათვის
• საქართველოს დამსახურებული მშენებელი