მამია ალასანია

დაბადების ადგილი: სოფელი ანაკლია, ზუგდიდის რაიონი.

დაამთავრა საქართველოს პოლიტექნიკური ინსტიტუტის ენერგეტიკის ფაკულტეტი.

მუშაობდა ზუგდიდის ენგურქაღალდკომბინატში ინჟინრად; 1967 წელს გაემგზავრა მოსკოვში; 1970 წელს დაამთავრა მოსკოვის უშიშროების კომიტეტის უმაღლესი სკოლა; სკოლის დამთავრების შემდეგ მუშაობდა ბათუმში აჭარის უშიშროების კომიტეტის სისტემაში; 1974 წლიდან სამუშაოდ თბილისში, უშიშროების კომიტეტის ცენტრალურ აპარატში გადავიდა და სხვადასხვა ხელმძღვანელ თანამდებობებზე მუშაობდა, მოგვიანებით კი სამხრეთ ოსეთის ავტონომიური ოლქის უშიშროების კომიტეტის უფროსი გახდა; 1980-1981წწ. ორჯერ, 6 და 9 თვით, ოპერატიული დავალებით მივლინებულ იქნა ავღანეთში. საქართველოს დამოუკიდებლობის გამოცხადების შემდეგ ხდებოდა ეროვნული უშიშროების სამსახურის ჩამოყალიბება საინფორმაციო სადაზვერვო ბიუროდ, რომლის შექმნისთანავე იგი ბიუროს უფროსის მოადგილედ დაინიშნა; 1992-1993 წლებში იგი სპეციალური დავალებით, კონკრეტულად კი სამოქალაქო დაპირისპირების აღმოფხვრის მიზნით, გაგზავნეს სამეგრელოს რეგიონში. 1993 წლის 27 სექტემბერს, ქალაქ სოხუმში სეპარატისტებმა მამია ალასანია მოკლეს. 2017 წლის ოქტომბერში მამია ალასანიას ნეშტი იდენტიფიცირებულ იქნა და სამხედრო პატივით დაიკრძალა თბილისში.

წყარო: საქართველოს თავდაცვის სამინისტრო: საქართველოს ეროვნული გმირები: history.mod.gov.ge

• 2018 - საქართველოს ეროვნული გმირი (გარდაცვალების შემდეგ)