სტეფანე ბურნაშოვი

დაბადების ადგილი: ქ. არხანგელსკი, რუსეთი.

თავი გამოიჩინა რუსეთ-ოსმალეთის ომში. 1783 წელს დაინიშნა რუსეთის მთავრობის წარმომადგენლად ქართლ-კახეთის მეფე ერეკლე II-ისა და იმერეთის მეფე სოლომონ I-ის კარზე. ამასთან, მეთაურობდა გეორგიევსკის ტრაქტატის (1783) თანახმად საქართველოში გამოგზავნილ ბატალიონებს. ხელი შეუწყო ერეკლე II-ისა და სოლომონ I-ის ურთიერთობის გაუმჯობესებას. 1787 წელს რუსეთის ჯართან ერთად გაიწვიეს საქართველოდან. რუსეთ-ოსმალეთის 1787-1791 წლების ომში დამსახურებისათვის მიენიჭა გენერალ-მაიორის წოდება. 1791 წლიდან კურსკის სამეფისნაცვლოს ("ნამესტნიჩესტვო") გამგებელი იყო, 1798 წლიდან-სენატორი. სამსახურიდან გადადგა და გარდაცვალებამდე თავის მამულში, კურსკის გუბერნიის სოფელ სპასკოეში ცხოვრობდა. 1793-1794 წლებში გამოაქვეყნა რამდენიმე ნაშრომი, რომლებშიც აღწერა საქართველოს, ირანის, აზერბაიჯანის და კავკასიის მთის ხალხების პოლიტიკური და ეკონომიკური მდგომარეობა. მნიშვნელოვანია მისი კარტოგრაფიული ნაშრომები. სტეფანე ბურნაშოვის მოხსენებები რუსეთის მთავრობისადმი მნიშვნელოვანი წყაროა XVIII საუკუნის 80-იანი წლების საქართველოს ისტორიისათვის (გამოქვეყნებულია მათი ნაწილი). რუსი სახელმწიფო მოღვაწე, სამხედრო ინჟინერი.

წყარო: საქართველო: ენციკლოპედია: ტ.I.–თბ., 1997.–გვ.507