გურამ კაკულია

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1964 წელს.

მუშაობდა სამშენებლო ტრესტ "სამგორწყალმშენის" სამშენებლო სამმართველოში მებეტონეთა ბრიგადირად, ოსტატად; იყო "საქენერგოს" სამშენებლო ტრესტის თბილისის სამშენებლო სამმართველოს სამუშაოთა მწარმოებელი, უბნის უფროსი; 1966 წელს დაინიშნა საქართველოს საშენ მასალათა მრეწველობის სამინისტროს სამშენებლო სამმართველოს უფროსად; 1975 წლიდან ტრესტის მმართველად; პროფესიული საქმიანობის სხვადასხვა ეტაპზე მონაწილეობდა სამშენებლო-სამრეწველო დანიშნულების ისეთი მნიშვნელოვანი ობიექტების მშენებლობაში, როგორებიცაა თელავისა და მეტეხის აგურის ქარხნები, რუსთავისა და კასპის ცემენტის ქარხნების გენერალური რეკონსტრუქცია; იყო საშენ მასალათა სამინისტროს კოლეგიის წევრი; მშენებელ-ტექნოლოგთა საერთაშორისო ასოციაციის წევრი (ქ. ბერლინი, გფრ); აწარმოებს სამშენებლო და სამონტაჟო სამუშაოებს, ასევე, საქართველოს საშენი მასალების ექსპორტიორია საზღვარგარეთის ქვეყნებში; განსაკუთრებით აღსანიშნავია მისი საქველმოქმედო მოღვაწეობა ეკლესია-მონასტრების მშენებლობაში, რომლის დასტურიცაა მარტვილის სოფ. ჯოლევში და რაჭაში აშენებული საეკლესიო კომპლექსები; მიღებული აქვს სახელმწიფო ჯილდოები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.272

• საქართველოს მშენებელთა კავშირი, წევრი