არჩილ ზურაბიშვილი

დაბადების ადგილი: ქ. ქუთაისი.

დაამთავრა თბილისის მეხუთე გიმნაზია 1914 წელს. შემდეგ სწავლობდა მოსკოვის საარტილერიო სასწავლებელში.

პირველი მსოფლიო ომის დროს იბრძოდა გერმანიის ფრონტზე რუსეთის არმიის შემადგენლობაში; რევოლუციის შემდეგ საქართველოში დაბრუნდა; მსახურობდა ქართულ სამხედრო უწყებაში, რომელსაც გენერალი ივანე ჯაფარიძე განაგებდა; 1919 წელს საქართველოს მთავრობამ არჩილ ზურაბიშვილი სხვებთან ერთად გააგზავნა საფრანგეთში სწავლის გასაგრძელებლად; შევიდა გრენობლის ელექტრო-ტექნიკურ ინსტიტუტში, რომელიც 1922 წელს დაასრულა. როდესაც მისი მშობლები საქართველოს ანექსიის შემდეგ პარიზში ჩამოვიდნენ, ოჯახს შეუერთდა. მსახურობდა "როლს-როისის" საზოგადოებაში. 1928 წელს შოთა ნიკოლაძესთან ერთად, ემიგრაციაში, დააარსა ქართული სპორტული საზოგადოება "შევარდენი"; ინჟინერ აპოლონ კობახიძესთან ერთად შექმნა "საფრანგეთში მყოფ ქართველ ინჟინერთა და ტექნიკოსთა საზოგადოება". იცოდა უცხო ენები ფრანგული, ინგლისური, გერმანული (ირაკლი წერეთელმა არჩილ ზურაბიშვილი თარჯიმნად წაიყვანა ბრიტანეთის საგარეო საქმეთა მინისტრ, ლორდ კერზონთან შეხვედრაზე). მას დიდი წვლილი უდევს პარიზში ქართული ეკლესიის ფუნქციონირებაში, იგი ხშირად ეხმარებოდა სამრევლოს. 1962 წელს, პარიზში, არჩილმა გამოსცა მამის, ივანე ზურაბიშვილის წიგნი "კარგ ქართველთა ხსოვნისათვის". საზოგადო მოღვაწე.

წყარო: დიასპორის საკითხებში საქართველოს სახელმწიფო მინისტრის აპარატი: diaspora.gov.ge