ომარ კიკნაძე

დაბადების ადგილი: დაბა სურამი.

დაამთავრა საქართველოს პოლიტექნიკური ინსტიტუტი სამთო საწარმოთა მშენებლობისა 1961 წელს და საინჟინრო ეკონომიკის 1975 წელს სპეციალობებით და საქართველოს სახალხო მეურნეობის უნივერსიტეტი 1987 წელს.

1960-1966წწ. მუშაობდა საქართველოს მშენებლობის სამინისტროს სამშენებლო გაერთიანება "მთავართბილმშენში" ბრიგადირად, მშენებლობის ოსტატად, სამუშაოთა მწარმოებლად; 1966-1971წწ. საქართველოს სასოფლო მშენებლობის სამინისტროს N3 სამშენებლო ტრესტის მთავარ ინჟინრად, მოგვიანებით - სამინისტროს საწარმოო განყოფილების უფროსის მოადგილედ, უფროსად; 1971-1973წწ. იყო საქართველოს მშენებლობის სამინისტროს N17 სამშენებლო ტრესტის მთავარი ინჟინერი; 1973-1977წწ. სამინისტროს N7 სამშენებლო-სამონტაჟო ტრესტ "საქშახტმშენის" მთავარი ინჟინერი და მმართველი; 1977-1981წწ. სამშენებლო გაერთიანება "თბილქალაქმშენის" უფროსი - მინისტრის მოადგილე; 1982-1983წწ. იყო საქართველოს მშენებლობის მინისტრის მოადგილე; 1983-1990წწ. "ცეკავშირის" გამგეობის თავმჯდომარის მოადგილე, გუდაურის კომპლექსის მშენებლობის უფროსი; 1990-1992წწ. გაერთიანება "საქმოქალაქმრეწვმშენისა" და კონცერნ "მსუბუქმრეწვმშენის" უფროსის მოადგილე; 1992-1996წწ. მუშაობდა საქართველოს არქიტექტურისა და მშენებლობის მინისტრის მოადგილედ, ცხინვალის რეგიონის აღდგენითი სამუშაოების შტაბის ხელმძღვანელად, რუსეთ-საქართველოს შერეული საკონტროლო კომისიის თავმჯდომარედ, ცხინვალის რეგიონის სტატუსის შემმუშავებელი კომისიის წევრად; 1996-2000წწ. ეწეოდა სამეწარმეო საქმიანობას; 2000-2005წწ. იყო სს "თბილგაზის" გენერალური დირექტორის მოადგილე; მისი ხელმძღვანელობითა და უშუალო მონაწილეობით აშენდა: მადნეულის სამთამადნო, კვაისის სამთო და რაჭის დარიშხანის სამთო-მეტალურგიული კომბინატები, ტყვარჩელის დოლომიტის კარიერი, გამწმენდ ნაგებობათა კომპლექსი, უნივერსიტეტი და ტელეცენტრი აფხაზეთში, მიწისქვეშა ელექტროსადგური მდ. ღალიძგაზე, გუდაურის სამთო-ტურისტული კომპლექსი, ტყიბულისა და ტყვარჩელის ქვანახშირის შახტები, მანგანუმის მაღაროები,  საბაგირო გზები რაჭასა და ტყიბულში, სამელიორაციო გვირაბები კახეთში, თბილისის ახალი მიკრორაიონები 3 მილიონამდე კვ.მ საცხოვრებელი ფართობებისა და კეთილმოწყობილი კვარტალებით; სამშენებლო გაერთიანება "თბილქალაქმშენის" უფროსად მისი მუშაობის პერიოდში დაინერგა საცხოვრებელი სახლების მშენებლობა ნაკადური მეთოდით და სამშენებლო პროცესის მართვის მოწინავე ავტომატიზებული სისტემა, საკვირაო-სადღეღამისო გრაფიკების საფუძველზე. მართვის აღნიშნული სისტემის დანერგვამ განაპირობა ქ. თბილისში საბინაო მშენებლობის მოცულობისა და საცხოვრებელი სახლების ფართობის ჩაბარების თითქმის გაორმაგება; 1980-1985წწ. არჩეული იყო საქართველოს უმაღლესი საბჭოს დეპუტატად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.307-308

• საპატიო ნიშნის ორდენი
• საქართველოს დამსახურებული ინჟინერი