იოსებ კიტოვანი

დაბადების ადგილი: ქ. გორი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო სპეციალობით 1975 წელს; საქართველოს მეცნიერებათა აკადემიის სამშენებლო მექანიკისა და სეისმოლოგების ინსტიტუტის ასპირანტურა 1978 წელს.

1977-1981წწ. მუშაობდა საქართველოს მშენებლობის სამინისტროს N9 სამშენებლო ტრესტის N2 სამშენებლო სამმართველოში მთავარ ინჟინრად, იმავე სამინისტროს N8 სამშენებლო ტრესტის N5 სამშენებლო სამმართველოს უფროსად; 1981-1985წწ. იყო საქართველოს სასოფლო მშენებლობის სამინისტროს საბინაო და სოცკულტსაყოფაცხოვრებო ობიექტების მშენებლობის საწარმოო სამმართველოს უფროსი, საქართველოს მშენებლობის სამინისტროს კომუნალური მეურნეობის ობიექტების მშენებლობის მთავარი საწარმოო სამმართველოს უფროსის მოადგილე; 1985-1991წწ. მუშაობდა გორის სახალხო დეპუტატთა საქალაქო საბჭოს აღმასკომის თავმჯდომარის მოადგილედ და საბინაო-კომუნალური მეურნეობის განყოფილების გამგედ; 1991-1992წწ. ქ. გორისა და გორის რაიონის პრეფექტის მოადგილედ; 1992-1998წწ. სათავეში ედგა საქართველოს სახელმწიფო ქონების მართვის სამინისტროს მშენებლობის განყოფილებას (იყო სამინისტროს კოლეგიის წევრი); მიღებულია აქვს საქართველოს მშენებლობის სამინისტროს საპატიო სიგელი და მადლობა.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.311-312

• საქართველოს მშენებელთა ფედერაცია, წევრი

• ღირსების მედალი