ბელა ცისკარიძე

დაბადების ადგილი: ქ. თბილისი.

დაამთავრა საქართველოს სასოფლო-სამეურნეო ინსტიტუტის სასოფლო-სამეურნეო პროცესების მექანიზაციის ფაკულტეტი 1959 წელს და კ. ამირეჯიბის სახელობის საქართველოს სოფლის მეურნეობის მექანიზაციისა და ელექტროფიკაციის სამეცნიერო-კვლევითი ინსტიტუტის ასპირანტურა 1965 წელს.

1959-1962წწ. სასოფლო-სამეურნეო ტექნიკის სახელმწიფო სპეციალურ საკონსტრუქტორო ბიუროში მუშაობდა ჯერ ინჟინერ-კონსტრუქტორად, შემდეგ უფროს ინჟინერ-კონსტრუქტორად. 1962-1965წწ. სწავლობდა ასპირანტურაში. 1966 წლიდან მუშაობდა  საქართველოს სოფლის მეურნეობის მექანიზაციისა და ელექტროფიკაციის სამეცნიერო-კვლევითი ინსტიტუტში, სადაც მან ეტაპობრივად გაიარა საქმიანი კარიერის აღმავალი საფეხური, ჯერ უმცროსი მეცნიერ-მუშაკი იყო, შემდეგ უფროსი მეცნიერ-მუშაკი, 1968-1972წწ. სამეცნიერო-კვლევითი სამუშაოების ორგანიზაციისა და კოორდინაციის განყოფილების გამგის მოადგილე, ხოლო 1972-1992წწ. ინსტიტუტის სწავლული მდივანის თანამდებობა ეკავა. 1968 წლიდან ის მუდმივად იყო ინსტიტუტის სამეცნიერო საბჭოს წევრი, აქტიურად მონაწილეობდა სამეცნიერო სამუშაოების ორგანიზაციისა და კორდინაციის განყოფილების მუშაობაში. ინსტიტუტი ასრულებდა მართვის ფუნქციას აღმოსავლეთ ევროპის ქვეყნების ეკონომიკური ურთიერთდახმარების საბჭოს ხაზით სამთო მიწათმოქმედების მექანიზაციისა და ელექტროფიკაციის საკითხებში და როგორც ამ მიმართულებით საბჭოთა კავშირში წარმოებული საქმეების კოორდინატორი ბ. ცისკარიძე მონაწილეობას იღებდა საკოორდინაციო შეხვედრებში უნგრეთში, ბულგარეთში, მოლდავეთში და სხვა ქვეყნებში. მას გამოქვეყნებული აქვს 14 სამეცნიერო ნაშრომი და 2 გამოგონების ავტორია. ინჟინერ-მექანიკოსი, ტექნიკურ მეცნიერებათა კანდიდატი(1966).

წყარო: საქართველოს ინჟინერი ქალები.- თბილისი.-2008.- გვ.197-199