ჯიმშერ კოკაია

დაბადების ადგილი: სოფელი ეშერა, სოხუმის რაიონი.

დაამთავრა თბილისის რკინიგზის ტრანსპორტის ინჟინერთა ინსტიტუტი ხიდებისა და გვირაბების მშენებლობის სპეციალობით 1944 წელს.

სწავლის პარალელურად 1943 წელს მუშაობდა სახელმწიფო საპროექტო ინსტიტუტ "სოიუზდორპროექტში"; 1945 წელს მივლინებით გაგზავნილი იყო მე-12 საფრონტო ექსპედიციის შემადგენლობაში, ჩრდილოეთ კავკასიის და უკრაინის ფრონტებზე, ბრძოლების შედეგად განადგურებული ხიდების აღდგენითი სამუშაოების განსახორციელებლად; ორი წლის შემდეგ კვლავ საპროექტო ინსტიტუტ "სოიუზდორპროექტის" თბილისის ფილიალშია, სადაც გაიარა გზა ხელოვნური ნაგებობების განყოფილების რიგითი ინჟინრის თანამდებობიდან განყოფილების უფროსამდე; ამ პერიოდში მისი ავტორობით დაპროექტებულ იქნა მთელი რიგი საავტომობილო გზები და ხიდები მდინარეებზე ფსოუ, ბზიფი, კოდორი, ხობი, ტეხურა, ნოღელა, რიონი და დურუჯი; 1960-1963წწ. მივლინებულ იქნა ავღანეთში, სადაც უაღრესად რთულ ბუნებრივ-კლიმატურ პირობებში ასრულებდა "კუშკა-გერათი-ყანდაღარის" საავტომობილო გზის საძიებო-საპროექტო სამუშაოებს (220 კმ-იანი მონაკვეთი); 1971-1975წწ. იყო საქართველოს მინისტრთა საბჭოს საქმეთა მმართველობის ჯერ რეფერენტი, შემდეგ კი მშენებლობისა და საქალაქო მეურნეობის განყოფილების უფროსი; 1976-1988წწ. საქართველოს მინისტრთა საბჭოს კაპიტალური მშენებლობის მთავარი სამმართველოს უფროსის მოადგილეა და კურირებს ჯანდაცვისა და განათლების სფეროს ობიექტების მშენებლობას; წლების განმავლობაში იყო თბილისის საქალაქო საბჭოს დეპუტატი; 1988-1999წწ. მუშაობდა ურბანიზაციისა და მშენებლობის სამინისტროში მთავარ სპეციალისტად და მინისტრის პირველი მოადგილის მრჩევლად; დაჯილდოებული იყო საბრძოლო ორდენით.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.317

• შრომის წითელი დროშის მედალი
• აფხაზეთის ავტონომიური რესპუბლიკის დამსახურებული ინჟინერი
• საქართველოს დამსახურებული ინჟინერი