ლილი ნუცუბიძე

დაბადების ადგილი: ქ. ქუთაისი.

დაამთავრა ქუთაისის პედაგოგიური სასწავლებელი 1948 წელს; 1953 წელს კი ალ. წულუკიძის სახელობის ქუთაისის პედაგოგიური ინსტიტუტის ქართული ენისა და ლიტერატურის ფაკულტეტი.

მუშაობდა პედაგოგიურ სასწავლებელში ბიბლიოთეკის გამგედ; 1950-1952 წწ. ასწავლიდა ქუთაისის ქალთა I საშუალო სკოლაში, რამდენიმე წელიწადს იმუშავა საქალაქო გაზეთ "სტალინელის" რედაქციაში ლიტმუშაკად და გამომშვებად; 1952-1964 წწ. ვ. კიკვიძის სახელობის ქუთაისის N1 საბავშვო ბიბლიოთეკის გამგეა; 1964 წელს  გადაიყვანეს ქალაქის (ქუთაისის) კულტურის განყოფილების უფროს ინსპექტორად, შემდეგ კი განყოფილების გამგის მოადგილედ; 1974-1987 წწ. ქუთაისის ილია ჭავჭავაძის სახელობის საჯარო ბიბლიოთეკის დირექტორია; 1987 წლიდან მუშაობდა საქართველოს მწერალთა კავშირის ქუთაისის განყოფილების კონსულტანტად. ლექსებს ადრეული ასაკიდან წერდა; მისი ლიტერატურული მემკვიდრეობა ორმოცამდე პოეტური კრებულია და უამრავი ამღერებული ლექსი; პირველი ლექსები პრესაში 1954 წელს გამოქვეყნდა, მისი პოეტური ნაწარმოებები სისტემატიურად იბეჭდებოდა ქართულ ჟურნალ-გაზეთებში, კრებულებში, ალმანახებსა და ანთოლოგიებში. 1959 წელს გამოიცა მისი ლექსების პირველი კრებული. პირველ წიგნს მოჰყვა კრებულები: "დედა და პოეტი" (1967), "ყველა ვარსკვლავი ციმციმებს შენთვის" (1969), "ვინ მიამბობს ზღაპარს" (1969), "ყველა ვარსკვლავი ციმციმებს შენთვის" (1970), "გიყვარვარ თუ არ გიყვარვარ?!" (1970), "ყვავილების დედოფალი" (1972), ლექსები (1972), ლექსები (1975), "მამულო ჩემო" (1975), "უცნობი კარუსელი"(1976), "ჩემი აკაცია" (1978), "ვალი გადაუხდელი" (1981), ლექსები (1982), "მზე უღიმის პატარებს" (1982), "ჩემი ლაჟვარდი" (1986), "ფიფქის სიმღერა" (1987), "ზამთარი მაინც არის ზამთარი" (1988), "მოვდივარ შენთან" (1989), "სიმღერა სიყვარულზე" (1990), "მოლოდინი" (1990), "მურიას თავგადასავალი" (1992), "სიყვარული და ცრემლები"(1993), "სათაფლიაზე ორი კვალია" (1995), "ქუთაისისთვის რაც მიმღერია" (1995), "თუ ვინმე გიყვარს" (2008), "რაც გულზე ამოვიქარგე" (2013). თანაავტორია წიგნებისა: "ზაქარია ფალიაშვილი და ქუთაისი" (1982), "პეტრე ჭაბუკიანი"(1968). ნაყოფიერად მუშაობდა მთარგმნელობით დარგში, წერდა მხატვრულ ნარკვევებს, ლიტერატურულ წერილებს, გამოკვლევებს. ქუთაისის თოჯინების სახელმწიფო თეატრში დაიდგა მისი რამდენიმე საბავშვო პიესა. მის ლექსებზე ქართველი კომპოზიტორების მიერ შექმნილია არაერთი სიმღერა, რომლებსაც მთელ საქართველოში მღერიან. იყო მრავალი საზოგადოებრივი გაერთიანების წევრი. განსაკუთრებით უნდა აღინიშნოს მისი მოღვაწეობა ქალთა ორგანიზაციებში. 2005 წლის  19 სექტემბრის  ქალაქ ქუთაისის საკრებულოს  N341 დადგენილებით ბასკეთის/ფალიაშვილის ქუჩის  III შესახვევს მიენიჭა საჯარო ბიბლიოთეკის ყოფილი დირექტორის, პოეტისა და გამოჩენილი საზოგადო მოღვაწის, ლილი ნუცუბიძის სახელი.

• 1997 - ღირსების ორდენი
• 1973 - საქართველოს კულტურის დამსახურებული მუშაკი

• ქუთაისისთვის რაც მიმღერია : ლექსები (Author). - ქუთაისი, 1995. - 60გვ.
• მურიას თავგადასავალი : ნახევარზღაპარი (Author). - ქუთაისი, სარანგი, 1992. - 4გვ.
• მოლოდინი : ლექსები (Author). - თბილისი, მერანი, 1990. - 224გვ.
• ზამთარი არის მაინც ზამთარი : ლექსები (Author). - თბილისი, მერანი, 1988. - 107გვ.
• დედა და პოეტი : ლექსები (Author). - თბილისი, ნაკადული, 1967. - 82გვ.