გივი კოხრეიძე

დაბადების ადგილი: ქ. ქუთაისი.

დაამთავრა თბილისის რკინიგზის ტრანსპორტის ინჟინერთა ინსტიტუტის სამშენებლო ფაკულტეტი სალიანდაგო მშენებლობის სპეციალობით 1948 წელს.

1948-1953წწ. მუშაობდა უკრაინაში, დონეცკის ოლქში, ომის დროს დანგრეული სარკინიგზო ობიექტების აღდგენაზე; 1953-1962წწ. იყო ამიერკავკასიის სატრანსპორტო მშენებლობის ტრესტის (გაგრაში, გუდაუთასა და სოხუმში) სამუშაოთა მწარმოებელი, უბნისა და სამმართველოს მთავარი ინჟინერი; 1962-1993წწ. სოხუმის საკავშირო მნიშვნელობის ფიზიკა-ტექნიკური ინსტიტუტის სამშენებლო-სარემონტო სამმართველოს უფროსი, ინსტიტუტის დირექტორის მოადგილე მშენებლობისა და სამეურნეო დარგში; ხელმძღვანელობდა ახალი ათონისა და ადლერის ვაგზლების შენობების, სოხუმში რკინიგზელთა კულტურის სახლის, ფიზიკურ-ტექნიკური ინსტიტუტის არაერთი უნიკალური ლაბორატორიული კორპუსის, საცხოვრებელი სახლების, სკოლების და ბაგა-ბაღების მშენებლობას, "სოხუმი-სოჭის" სარკინიგზო მაგისტრალის ელექტრიფიცირებას; არაერთგზის იყო არჩეული სოხუმის საქალაქო საბჭოს დეპუტატად.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.323

• საპატიო ნიშნის ორდენი
• აფხაზეთის დამსახურებული ინჟინერი
• საქართველოს დამსახურებული ინჟინერი