ბიჭიკო მელაძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1956 წელს.

1956 წელს მუშაობა დაიწყო "ხრამჰესის" მშენებლობაზე, სამშენებლო ტრესტ "ხრამჰესმშენის" N2 სამშენებლო-სამონტაჟო სამმართველოს უბნის ოსტატად, სამუშაოთა მწარმოებლად; 1959 წელს გახდა საქართველოს ენერგეტიკისა და ჰიდროტექნიკურ ნაგებობათა სამეცნიერო-კვლევითი ინსტიტუტის ასპირანტი; 1971 წლამდე მუშაობდა ინჟინრის, უფროსი ინჟინრის, მეცნიერ-მუშაკის თანამდებობებზე; 1971-1974წწ. სსრ კავშირის ენერგეტიკისა და ელექტრიფიკაციის სამინისტროს მიერ მოვლინებული იყო სირიის არაბთა რესპუბლიკაში ჰიდროელექტროსადგურის მშენებლობაზე, სადაც ხელმძღვანელობდა ცენტრალურ ლაბორატორიას; 1978 წელს დაინიშნა საქართველოს მინისტრთა საბჭოსთან არსებული მელიორაციისა და წყალთა მეურნეობის მთავარი სამმართველოს სამშენებლო ტრესტ "მტკვარწყალმშენის" მთავარ ინჟინრად; 1981 წელს დაინიშნა სამეცნიერ-საწარმოო გაერთიანება "საქნაპირდაცვის" გენერალური დირექტორის მოადგილედ - მთავარ ინჟინრად, სადაც მუშაობდა სიცოცხლის ბოლომდე; უდიდესი წვლილი აქვს შეტანილი საქართველოს შავი ზღვის სანაპიროზე წარეცხილი პლაჟების აღდგენაში, ახალი პლაჟების შექმნასა და დაცვაში ნაპირფორმირების ახალი მეთოდის დანერგვის გზით; წლების განმავლობაში ეწეოდა პედაგოგიურ მოღვაწეობას საქართველოს ტექნიკურ უნივერსიტეტში, სადაც მუშაობდა სამშენებლო წარმოების ტექნოლოგიის კათედრაზე; 1990 წელს ამავე კათედრაზე აირჩიეს დოცენტად; 1993 წელს ზღვის ნაპირების დაცვის საინჟინრო გადაწყვეტის საკითხებზე სადოქტორო დისერტაციის დაცვის შემდეგ - პროფესორად; გამოქვეყნებული აქვს 100-მდე სამეცნიერო ნაშრომი, მონოგრაფია, არის 8 გამოგონების ავტორი

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.392-393

• 1983 - საქართველოს დამსახურებული ინჟინერი