მარგალიტა მეცხრიკაძე

დაბადების ადგილი: ქ. სამტრედია.

დაამთავრა ამიერკავკასიის სამიმოსვლო გზების ინჟინერთა ინსტიტუტის სამშენებლო ფაკულტეტი 1935 წელს.

1936 წელს მუშაობა დაიწყო საქართველოს შინაგან საქმეთა სამინისტროს გზატკეცილების მთავარი სამმართველოს სისტემაში N716-ე საგზაო საექსპლუატაციო სამმართველოს ინჟინრად, უფროს ინჟინრად; 1939 წელს იყო ამავე ორგანიზაციის უფროსი; 1946 წლიდან N731-ე საგზაო საექსპლუატაციო სამმართველოს უფროსი იყო; 1949 წელს გადაიყვანეს N732-ე საგზაო საექსპლუატაციო სამმართველოს უფროსად აფხაზეთში, სადაც 1965 წლის ბოლომდე მუშაობდა; იყო პირველი და ერთადერთი ქალი საქართველოში, რომელიც ხელმძღვანელობდა საავტომობილო გზების საგზაო-საექსპლუატაციო სამმართველოს, არაერთგზის იყო არჩეული რაიონული საბჭოების დეპუტატად; მისი უშუალო ხელმძღვანელობით და მონაწილეობით აშენდა და რეკონსტრუირებული იყო მრავალი საგზაო ობიექტი, მათ შორის: "დუშეთი-ყაზბეგი-ვლადიკავკაზის", "ფშავ-ხევსურეთის" რეგიონის, "ზაჰესი-გორი-ბორჯომის", "გუდაუთა-განთიადი-ლოო-სოჭის" საავტომობილო გზები, სამდინარო ხიდები და სხვა. მიღებული აქვს საქართველოს უმაღლესი საბჭოს პრეზიდიუმის საპატიო სიგელი.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.403-404

• საპატიო მეგზევე
• საპატიო ნიშნის ორდენი
• საქართველოს დამსახურებული ინჟინერი